सूचकका आधारमा शौचालयहरूको वर्गीकरण गरिन्छ : प्रमुख प्रशासकीय अधिकृत परियार

काठमाडौँ- काठमाडौँ महानगरपालिकाका प्रमुख प्रशासकीय अधिकृत प्रदीप परियारले सार्वजनिक शौचालयको स्तर सुधार र पहुँच वृद्धि गर्न सहकार्य र सहयोग भइरहेको बताएका छन् । सूचकका आधारमा शौचालयहरूको वर्गीकरण गरिने उनको भनाइ छ ।

सार्वजनिक निजी साझेदारी एकाइले आयोजना गरेको सार्वजनिक शौचालयका सञ्चालकहरूसँगको छलफलका क्रममा यस्तो धारणा राखेका हुन् । ‘अहिले हामीले सर्वसाधारणलाई निःशुल्क शौचालय उपलब्ध गराउने संघ संस्थाहरूलाई सहयोग गरिरहेका छौँ । महानगरको सुविधा लिएर शौचालय प्रयोग खुला नभएको गुनासो पनि आएका छन् । कतिले धेरै राम्रो पनि गर्नु भएको छ ।’ सेवा दिने र नदिने तथा धेरै उपयोग हुने र कम उपयोग हुनेजस्ता सूचकका आधारमा निःशुल्क सार्वजनिक शौचालयको वर्गीकरण गर्ने र सेवा तथा स्वच्छताका आधारमा सहयोग उपलब्ध गराउने योजना रहेको उनको भनाइ छ ।

---

सहरमा भएका हरेक व्यक्तिले चाहेका बेला शौचालय निःशुल्क प्रयोग गर्न पाउने वातावरण मिलाउन महानगरपालिकाले निजी तथा व्यावसायिक, वित्तीय तथा सार्वजनिक संघसंस्थालाई आफूसँग भएका शौचालय निःशुल्क सार्वजनिक शौचालयका रूपमा रूपान्तरण गर्न प्रोत्साहन गरिरहेको छ । यसरी सञ्चालन भएका शौचालय सफा राख्न महानगरपालिकाले सफाइमा प्रयोग हुने जिन्सी सामाग्री उपलब्ध गराउने गरेको छ ।

एकाइका प्रमुख नरेन्द्रविलास बज्राचार्य भन्छन्, ‘चालु आर्थिक वर्षमा थप ३ सय वटा शौचालय सार्वजनिक रूपमा सञ्चालन गर्ने लक्ष्य छ । यस क्रममा गएको शुक्रबार ११ वटासँग सम्झौता भइसकेको छ । यीमध्ये पनि ६ वटालाई सरसफाइका सामग्री प्रदान गरेका छौँ ।’ यसरी उपलब्ध गराइने सामग्रीमा निःशुल्क शौचालयको सूचना बोर्ड, शौचालय सफाइ गर्ने, दुर्गन्ध हटाउने सामग्री छन् । 

होटल व्यवसायी महासंघका केन्द्रीय महासचिव टीआर भण्डारी भन्छन्, 'हामी होटलहरूमा भएका शौचालयलाई सार्वजनिक बनाउन तयार छौँ । हामीलाई स्वच्छता र सरसफाइका लागि महानगरपालिकाले सहयोग गरिदिनुपर्छ ।' उनले होटलहरूले सबैका लागि शौचालय निःशुल्क उपलब्ध गराउने, महानगरपालिकाले निःशुल्क फोहोर संकलन गरिदिनु पर्ने गरी सहकार्य गर्न पाए, दिगो हुने प्रस्ताव राखे । 

महासंघका बागमती प्रदेश अध्यक्ष दामोदर नेपालका अनुसार वागमती प्रदेशमा करिब १३ हजार र काठमाडौँ महानगरपालिकाभित्र मात्र करिब २ हजार ५ सय होटल छन् । होटलका शौचालयहरू सर्वसाधारणलाई निःशुल्क उपलब्ध गराउन पत्राचार गरिसकिएको छ । 

आफ्ना शौचालयलाई निःशुल्क सार्वजनिक शौचालयमा रूपान्तरण गर्नेहरूलाई महानगरपालिकाको सार्वजनिक निजी साझेदारी एकाइले वर्षको ३ पटक निःशुल्क सफाइका सामान उपलब्ध गराउनेछ । शौचालयको स्वच्छता सम्बन्धी आचरण विकास गर्न यी सामान उपलब्ध गराउँदै आएको छ ।

टिनको बाकसमा हालेर सेतो फिनेल, कालो फिनेल, दाना फिनेल, हार्पिक, युरिन प्याड, कुचो, खरेटो, वाइफर, मफ, बाल्टिन, साबुन, डोरम्याटसहितका सामान दिइएका छन् । यस्तै डिटोल, रुमाल, रुम स्प्रे, डस्ट विन, ट्वाइलेट पेपर, कोलिन, जाम खोल्ने पम्प, झोल साबुन, ट्वाइलेट ब्रससहितका सामान उपलब्ध गराइन्छ ।