इकागज संवादमा सीपी मैनाली
संघीयता रहोस् तर प्रदेश र धर्म निरपेक्षता खारेज गर्नुपर्छ
दसैंमा ज्ञानेन्द्र शाहबाट आएको अभिव्यक्ति ऐतिहासिक हो
अहिलेको व्यवस्था खारेज गरेर संवैधानिक राष्ट्र प्रमुख भएको प्रणालीमा जानुपर्छ
कुनै बेलाका बहुचर्चित क्रान्तिकारी कम्युनिष्ट नेता चन्द्रप्रकाश (सीपी) मैनाली यतिखेर राजनीतिक सिद्धान्तका हिसाबले पूरै बदलिएका छन् । भन्दैछन्, ‘दसैँमा ज्ञानेन्द्र शाहबाट आएको अभिव्यक्ति ऐतिहासिक हो ।’ भर्खरै उनको पार्टी नेकपा मालेको महाधिवेशन चितवनमा सुटुक्क भयो, अनि फेरि आफैँ नेतृत्वमा स्थापित भएका छन् । ‘अनुभवीले मात्र सही नीति र नेतृत्व दिन सक्छ’ उनी तर्क गर्छन् । शक्तिशाली कम्युनिष्ट पार्टी एमाले निर्माणको जग बसाउने मैनाली २०५४ मा विभाजन गरी मालेलाई निरन्तरता दिँदै आएका छन् । उनै मैनालीसँग महाधिवेशन, परिवर्तित राजनीतिक सिद्धान्त, बुझाइलगायतका विषयमा इकागजका विनोद देवकोटाले गरेको कुराकानीको अंशः
महाधिवेशन त कसैलाई सुइँको पनि नदिई गर्नुभयो, किन ?
- सुटुक्क होइन । अलि ढिलो निर्णय गरेको हुनाले बढी व्यस्त हुनुपर्यो । धेरै प्रचारप्रसार गर्न पनि हामीले चाहेनौँ । कात्तिक २५ गते मात्रै पत्रकार सम्मेलन गरेर जानकारी दियौँ । सुटुक्क गरे जस्तो देखिए पनि त्यो होइन । कात्तिक २७ गते उद्घाटन गरेर २९ गतेसम्म बन्द सत्र पनि समापन गरेर सफलतापूर्वक टुंग्यायौँ ।
अरु पार्टी पनि चितवन नै ताक्ने । तपाईँहरूले पनि त्यही ठाउँ छान्नु भयो । चितवनमा केही विशेष छ र ?
- जाडोमा सबैतिरबाट आउन सेन्टर पर्ने । त्योबाहेक सजिलो र छोटो पर्ने हुनाले चितवन रोज्यौँ । अरु केही होइन ।
दुई ठूला दलको महाधिवेशसनका चपेटामा पर्नुभयो क्या ?
- होइन, हाम्रो आफ्नै कामको चपेटामा पर्यौँ । दस्तावेज बनाउने, व्यवस्थापनका काम गर्ने, सहयोग जुटाउने आदिमा सक्रिय भयौँ । हामीले प्रचार गर्न पाएनौँ । सबै कुरा सुनिश्चित नभइकन बढी चर्चा गर्नु पनि ठीक ठानेनौँ । सुनिश्चित भइसकेपछि हामीले चितवनमै पत्रकार सम्मेलन गरेका थियौँ । काठमाडौंमा गरेनौँ ।
महाधिवेशनबाट फेरि नेतृत्वमा आफैँ नवीकरण भएर आउनुभयो ?
- हामी सबैले कोर्स परिवर्तनको निर्णय गरेको हुनाले यसलाई व्यवहारमा उतार्ने काममा तपाईँले नै नेतृत्व गरिदिए राम्रो हुन्छ भन्ने आयो । यसबीचमा अरु नयाँ साथीहरू, सक्षम नेताहरू पनि नेतृत्वमा विकास गर्न सकिएला भनेर साथीहरूले मलाई अनुरोध गरे । मैले पनि नाइँ भन्न उचित ठानिनँ । किनभने त्यस लेबलमा साथीहरूको विकास हुँदैछ । त्यसकारण अफ्ठ्यारो मानी मानी पनि जिम्मेवारी लिएको छु । ८१ जनाको केन्द्रीय सदस्य बनाउने नीतिगत निर्णय भएको छ । ६० जना निर्वाचित भए । अरु ठाउँ बाँकी छन् । यस पटकको हाम्रो महाधिवेशन ऐतिहासिक हो । कोर्स करेक्सन गर्ने, कोर्स चेन्जिङ महाधिवेशन हो ।
राजालाई पनि देश जोगाउने अधिकार छ । म जस्तो साम्यवादीलाई पनि नेपाल जोगाउने अधिकार छ । हिजो जसका पिता पूर्खाले देश बनाए उसका सन्तानले देश बनाउने आन्दोलनमा लाग्नु हुँदैन भन्ने छैन । जनताले अघि सारेका एजेन्डामा सहमति र सहयोग हुन्छ भने उनीहरू पनि आन्दोलनका शक्ति हुनसक्छन् ।
अहिलेसम्म सक्षम नेतृत्व तयार गर्न नसक्नु त यहाँकै कमजोरी हो नि, हैन र ?
- हाम्रो त्यस्तो हुँदैन । देउसीभैलोको टिम लिडर छानेजस्तो होइन नेतृत्व । चन्दा उठाउने लिडर छानेजस्तो होइन । अरु पार्टीमा पनि त्यस्तो हुँदैन । कम्युनिष्ट पार्टीको नेतृत्व भनेको त्यसका सिद्धान्त, नीति, विचार र मान्यतालाई बुझ्ने त्यसलाई लेखेर, बोलेर अभिव्यक्त गर्नसक्ने, जनतालाई गोलबन्द गर्नसक्ने हुनुपर्छ । त्यो खुबी, शैली भएको र जनताले पत्याएको हुनुपर्छ । कार्यकर्ताले पनि पत्याउको मान्छे नै नेता हुने हो । कुनै दुर्घटनावस नेतृत्व आउने बेग्लै हो । स्वाभाविक रूपमा कम्युनिष्ट पार्टीको नेतृत्व यसरी विकास हुन्छ । उसले काममा लागेरै काम सिक्छ । सिद्धान्तलाई गहिरो ढंगले बुझ्छ । नेतृत्वको कौशलता र व्यवस्थापनको क्षमता बढ्छ । जनतामा विश्वास बढ्छ । आत्मबल बढ्छ । अरु साथीले पनि भरोसा गर्न सक्छन् र त्यस्तोलाई प्रक्रिया मुताबिक नेतृत्व दिइन्छ ।
त्यस्तो व्यक्ति अहिलेसम्म तयार भइसकेको छैन ?
- हुँदैछन् । बन्दैछन् । स्वाभाविक छ कि हामीले २०५८ सालमा बडो अफ्ठ्यारो अवस्थामा पार्टी बनाएका हौँ। २०३९ सालदेखि मध्यममार्गीले हाइज्याक गरे । ०३९ सालमा उठ्नै नसक्नेगरी कारबाही गरे । ०४९ सालमा मार्क्सवादी पार्टी भन्ने पुँजीवादी सिद्धान्तलाई अवलम्बन गरे जनताको बहुदलीय जनवाद नामको । त्यसैले त्यो पार्टी कम्युनिष्ट रहेन । संख्या बढ्यो, त्यसका धेरै कारण छन् । अहिले व्याख्या नगरौं । राम्रा नराम्रा मान्छे भेला भए । तर, गुण चाहिँ कम्युनिष्ट रहेन । २०५४ सालमा महाकाली सन्धिका विषयमा मतभिन्न भयो । पार्टी फुट्यो । नयाँ बन्यो । केही फेरि एमालेमै गए । हामीले निरन्तरता दियौँ । त्यसका धेरै कारण छन् ।
महासचिवमा यहाँलाई नविकरण गर्नेबाहेक अरु के भयो महाधिवेशनमा ?
- यो ७२ वर्षको कम्युनिष्ट आन्दोलनकै निरन्तता हो । २००६ साल वैशाख १० गते पुष्पलालले स्थापना गरेको आन्दोलनको हामीले समीक्षा गर्यौँ। हामीले २००७ साल, ०४६ साल र ०६३ मा परिवर्तन गर्यौँ । २०१७ सालमा पनि एउटा रियाक्टिभ परिवर्तन भयो । त्यहाँदेखि समग्र हेर्दा परिवर्तन भयो । यस्ता धेरै भए । नयाँ जनवादी क्रान्ति किन पूरा गर्न सकेनौँ भन्ने कुरामा खुब छलफल गर्यौँ ।
निष्कर्ष चाहिँ के निकाल्नुभयो ?
- हामीले पार्टी बनाएदेखि नै सिद्धान्त, विचार र राजनीतिमा पुनःनिर्माण गर्दै गयौँ । २०६० सालदेखि त्यसको स्टेप चाल्दै जाँदा अहिले त्यसको ‘रिकन्स्ट्रक्सन’को एउटा चक्र पूरा गर्यौँ । हामीले के देख्यौँ भने नेपाली क्रान्तिको बाटो विगत कालमा जे भन्दै आयौँ लगभग त्यो चिनियाँ क्रान्तिको बाटो दीर्घकालीन सशस्त्र आन्दोलन गरेर क्रान्ति विजयी गर्ने बाटो नै क्रान्तिकारी थियो । त्यो बाटो हाम्रो देशमा उपयुक्त रहेनछ । नेपालको संवेदनशील भूराजनीतिक हिसाबले, भारतमाथिको निर्भरतालगायत तमाम कारणले गर्दा त्यो बाटो सही रहेनछ । चिनियाँ क्रान्ति भनेको दमनको विरोधमा सशस्त्र क्रान्तिको बाटो हो । चीनको क्रान्ति त्यही बाटोमा गयो । उनीहरूले जनगणतन्त्र चीन बनाए र खडा गरे । तर हाम्रो हाम्रो चाहिँ वर्गीय र राजनीतिक द्वन्द्व चर्केर विस्फोटक बिन्दुमा केही परिवर्तन माग गरिरहेको हुन्छ । त्यसमा केही राजनीतिक परिवर्तन विदेशी शक्तिहरूले नेपाली राजनीतिक पक्षहरूलाई र आन्दोलनकारी पक्षसँग मिलेर गरे । उनीहरूले केही कुरा दिने र आफ्नो हस्तक्षेप गर्ने काम गर्दा रहेछन् ।
यस्तै परिवर्तन बीचबीचमा भए । बाह्य शक्ति सुरुमा भारत मात्रै र पछि ०४६ सालमा भारत र यूरोपियन यूनियन, ०६३मा भारत, युरोपियत यूनियन र अमेरिका मिलेर आफ्नो डिजाइनमा परिवर्तन अवतरण गराए । भूराजनीतिक स्थितिले गर्दा नेपालमा सशस्त्र आन्दोलन गरेर विजयी हुने बाटो रहेनछ । अब राष्ट्रिय/अन्तर्राष्ट्रिय स्थितिमा मात्रै जनताले आफ्नो बल प्रयोग गरेर जनसत्ता स्थापना गर्न सक्ने बाटो नेपालको नेपाली क्रान्तिको बाटो रहेछ । चिनियाँ क्रान्तिको जस्तै भए पनि बाटो चाहिँँ नेपालको अनौठो रहेछ । यो नजान्दा हामीले २००७ सालमा पनि क्रान्ति पूरा गर्न सकेनौं । ०४६ सालमा भयो । २०५२ देखि माओवादीले उग्र वामपन्थीको बाटो लियो । स्थापनाको लामो समयपछि यो अध्ययन गर्ने क्रममा बाटो नै चीनको जस्तो रहेनछ ।
नयाँ बाटो चाहिँ के हो ?
- यो बाटो भनेको लामो समयसम्म विकासवादी ढंगले जाँदो रहेछ र वर्गीय र राजनीतिक द्वन्द ठाउँठाउँमा विस्फोट हुँदा ००७, ०४७ वा ०६३ जस्तो केही परिवर्तन हुने रहेछ । त्यस बेला कुरा नबुझेको हुनाले ००७, ४६, ०६३ सालको परिवर्तनमा परिवर्तनकारीलेहरूले सुरुमा भारतको सहयोग लिएर हस्तक्षेत्र र प्रभाव निम्त्यिाए । पछि भारत र युरोपियनलाई निम्त्याइयो । म पनि साक्षी छु । उनीहरूको हस्तक्षेपमा परिवर्तन भयो । ०६३ मा भारत, युरोपियन युनियन, अमेरिकालगायतको मद्दतले यहाँ केही परिवर्तन गरेर आयो । विदेशी हस्तक्षेपसहितको परिवर्तन भयो ।
हुनुपर्ने चाहिँ कसरी रहेछ ?
- अनकुल स्थितिमा मात्रै जनताले आफ्नो बलमा आमूल परिवर्तन गर्न सक्ने रहेछ । त्यसअनुरूप नै हाम्रो रानजीतिक रणनीति, कार्यनीति बनाउनु पर्दो रहेछ भन्ने कुरालाई बुझ्यौँ । कोर्स करेक्सन भनेको यही हो ।
अहिलेको संसदीय प्रणाली असफल भइसक्यो । पूँजीवादी प्रजातन्त्रलाई लिड गर्न जुन शासकीय स्वरूप ल्यायो यो ‘अनइफेक्टिभ, ननडेलिभरी’वाला भयो । यसलाई खारेज गर्नुपर्छ । प्रत्यक्ष निर्वाचित कार्यकारी प्रमुख भएको र संवैधानिक राष्ट्र प्रमुख भएको प्रणालीमा जानुपर्छ ।
पुष्पलालले सात सालपछि पनि विधानसभामार्फत जनगणतन्त्र ल्याउने सोच राख्नु गलत थियो । वस्तुगत थिएन । मालेले पनि झापा विद्रोहमा पञ्चायतको विरुद्धमा बल प्रयोग गर्नु त ठीकै थियो । तर, हामीले त्यसबेलै जनगणतन्त्र ल्याउने कार्यनीति बनाउनु गलत थियो । ४६ सालमा निर्दल हटाउने आन्दोलनमा केही दलहरू निर्दललाई प्रहार गर्थे र जनगणतन्त्रको माग गर्थे । तिनै शक्ति बढेर ०५२ सालमा फेरि सशस्त्र आन्दोलन सुरु गरेर जनगणतन्त्र कायम गर्न उग्र कार्यनीति लिए र पछि भारतमा आश्रय लिए । उत्पीडनकारी मुलुकको सहयोग लिएर नेपालजस्तो उत्पीडित मुलुकको शासकको विरुद्धमा क्रान्ति गर्ने ‘एन्टी माक्र्सिस’ काम गरे । विभिन्न परिवर्तनमा विदेशी हस्तक्षेत्र यति धेरै बढ्यो । हाम्रो राष्ट्रको निर्णायक क्षमता कमजोर भयो । यो कुरालाई बुझेको हुनाले अहिले उनीहरूकै प्रभाव घटाउन हामीले लड्नु परेको छ । भित्रि अव्यवस्था र बाह्य हस्तक्षेपका कारण झन् हस्तक्षेप बढेको छ ।
यहाँहरूले गर्न खोजेको परिवर्तन चाहिँ कसरी हुन्छ, के गर्नुहुन्छ ?
- अब परिवर्तनका लागि भारत, युरोयिन युनियन वा अमेरिकालाई गुहार गर्दैनौँ । उनीहरूकै प्रभाव घटाउन हामीले चारै खाले देशभक्तहरू (कम्युनिष्ट, गैरकम्युनिष्ट बामपन्थी, प्रजातन्त्रवादी र राष्ट्रवादी)सँग मिलेर परिवर्तन गर्ने हो । त्यसभित्र रहेका देशभक्तहरू, त्यसभित्रै पनि विदेशभक्त छन् । तीबाहेक जो देशभक्तहरू छन् उनीहरूलाई देशका ज्वलन्त समस्याहरूको देशमुखी समाधानका लागि गोलबन्द गरेर अहिलेको विदेशमुखी राजनीतिको कोर्स करेक्सन गर्ने, विकृत राजनीतिलाई शुद्धिकरण गर्ने हो । सात सालमा पनि संसदीय प्रणाली आयो, दुर्घटना भयो । ०४६ पनि आयो दुर्घटना भयो । ०६३ सालपछि यसलाई सुधार गरेर ल्याइयो । सुधार गर्नेले नै खाइदिए । यो बेकम्मा बनाइदिए । यो असफल भइसक्यो । अहिले यो पूँजीवादी प्रजातन्त्रलाई लिड गर्न जुन शासकीय स्वरूप ल्यायो यो ‘अनइफेक्टिभ, ननडेलिभरी’वाला भयो । यसलाई खारेज गर्नुपर्छ । प्रत्यक्ष निर्वाचित कार्यकारी प्रमुख भएको र संवैधानिक राष्ट्र प्रमुख भएको प्रणालीमा जानुपर्छ ।
चुनाव प्रणाली बदल्नुपर्छ । यो चुनाव प्रणाली लुटतन्त्र र धनतन्त्रमा बदलियो । सानो संसद बनाउनुपर्छ । त्यसमा सांसदहरूलाई मन्त्री बनाइनु हुँदैन । दलहरूले आफ्नो एक्सर्पहरूको पुलमार्फत कानुन बनाएर उनीहरूले सरकार बनाउन् । संघीयता रहोस् तर, प्रदेशले खारेज गर्नुपर्छ । धर्म निरपेक्षताका कुरा नेपालजस्तो मलुकमा अहितकर भयो । यसको अर्थ क्रिस्चयिनकरण भयो । हाम्रो पहिचानलाई लोभ गराउँछ । यसलाई खारेज गर्नुपर्छ । यसलाई हिन्दू राष्ट्र बनाउने पनि होइन । यो अन्यायपूर्ण हुन्छ । नेपालका सबै धर्मप्रति सहिष्णु भाव वा मैत्रीभभाव राख्ने राज्य हुनुपर्छ । नेपाललले अब अर्को क्रान्ति धान्न सक्दैन । जनमतबाटै अब परिवर्तन हुने हो । कसैले दुई तिहाइ ल्याउँला र संविधान संशोधनमार्फत गर्ला वा जनआन्दोलनको बलमा गर्ला । यो कार्य दिशा हो ।
संवैधानिक राष्ट्र प्रमुख राख्ने कुरा गर्नुभयो, माओवादीले भन्दै आएको र तपाईँले भनेको एउटै हो ?
- हामीले खोजेको माओवादीले भनेजस्तो प्रत्यक्ष निर्वाचित कार्यकारी प्रमुख होइन । हामी त्यो प्रत्यक्ष निर्वाचनको पक्षमा छैनौँ । नेपालजस्तो देशमा अलिकति पावर ब्यालेन्स राख्नसक्ने व्यक्ति संवैधानिक राष्ट्र प्रमुख हुनुपर्छ । त्यो संवैधानिक हुनुपर्छ । संविधान भित्रको, संसद् मातहतको हुनुपर्छ । त्यसलाई केही अधिकार दिए पनि त्यो संविधानले दिएको अधिकार जनप्रतिनिधिले नै नियन्त्रण गर्नसक्ने हुनुपर्छ । त्यसकारण यो माओवादीले भनेजस्तो राष्ट्रपतीय प्रणाली, ऊ नै कार्यकारी भएको प्रणाली होइन । ता कि प्रधानमन्त्री अति बढी ढंगले जान नसक्नेगरी चेक एन्ड ब्यालेन्सको स्थिति होस् भन्ने हो ।
त्यसलाई कसरी चुन्ने त, त्यस्तो व्यक्ति को हुन्छ ?
- जोजो आन्दोलनको मान्यतालाई बोकेर अहिलेको विकृतिको विरुद्धमा, विदेशमुखी राजनीतिको विरोधमा, जनताको पहिचान, धर्म निरपेक्षतालगायतका मुद्दामा, अर्थतन्त्र निर्माणको विषयमा आउँछन् । देशलाई हरेक हिसाबले बलियो बनाउने एजेन्डामा सहमत हुने सबै यसमा सहभागी भएर आउन सक्छन् ।
त्यो भनेको ‘सेरेमोनियल किङ’ वा पहिलेको राजाजस्तो परिकल्पना गर्नुभएको हो ?
- राजालाई पनि देश जोगाउने अधिकार छ । म जस्तो साम्यवादीलाई पनि नेपाल जोगाउने अधिकार छ । हिजो जसका पिता पूर्खाले देश बनाए र उसका सन्तानले देश बनाउने आन्दोलनमा लाग्नु हुँदैन भन्ने छैन । उनीहरूको पनि आन्दोलनमा जनताले अघि सारेको एजेन्डामा सहमति र सहयोग हुन्छ भने आन्दोलनका शक्ति हुनसक्छन् । तर, हामी कसैले भनेजस्तो फलानो आओस् देश बचाओस् भन्नेजस्तो अन्धविश्वासी कुरा गर्दैनौँ ।
कम्युनिष्ट, वामपन्थी, प्रजातन्त्रवादी र राष्ट्रवादी देशभक्तहरू (त्यो भनेको राजा, देउवा, धर्म, कर्म, परम्परालाई मान्ने मान्छेलाई हामीले राष्ट्रवादी भन्छौँ) जो आन्दोलनमा सहभागी हुन सक्छन् उनीहरूले आफ्नो योगदान र योग्यता मुताविक देश सञ्चालन गर्ने काममा भाग लिन सक्छन् ।
यो त राजातिर लक्षित देखियो ?
- यो कसले कसरी बुझ्छ भन्ने कुरो । तपाईँले त्यसरी बुझ्नुभयो । त्यो तपाईँको खुसीको कुरो हो ।
हामीले अहिलेसम्म लडेर ल्याएको सबैभन्दा ठूलो अधिकार के ? त्यो राजा फाल्नु पनि होइन । सबभन्दा ठूलो अधिकार २०६३ सालको वैशाख १० गते तत्कालीन राजा ज्ञानेन्द्रसँग तत्कालीन सात दलका(हामी थिएनौँ) र माओवादीले तीन पक्षले के सहमति गरे भने अब देशको सार्वभौम सत्ताको स्रोत र मालिक पनि जनता नै हो । राज्यको राष्ट्रिय अधिकारको स्रोत पनि जनता नै हो । यी दुईटा कुरालाई आत्मसात गर्दै तत्कालीन घोषणा–पत्रमा राजाले भनेका छन्, ‘जनआन्दोलनको भावनालाई लिएर दलहरूको भावनालाई समेटेर म ०५९ सालको विघटित प्रतिनिधि सभालाई पुनःस्थापना गर्छु’ ।
नीतिमा मार्क्सवाद मान्छु । यो आउटडेटेट भएको छैन । यसलाई नेपालको सन्दर्भमा प्रयोग गर्नुपर्छ । गायत्री मन्त्रजस्तो होइन । नेपालको परिवर्तनसँग जोडेर सिजनात्मक प्रयोग गर्नुपर्छ ।
६३ सालको राजाको घोषणा ०४७ सालको संविधानभन्दा अग्रगामी हो । त्यसअनुसार वैशाख १० गतेको घटना हो । पुनःस्थापित संसद्पछिको बैठकले २०६३ जेठ ४ गते एउटा संसद्को घोषण–पत्र भनेर जारी गर्यो । त्यसले शाही सेनालाई नेपाली सेना भन्ने, राजाको सम्पत्तिलाई राष्ट्रियकरण गर्ने, राजाको सम्पत्तिलाई नागरिक सरह कर लगाउने, राजा, राजदरबार र उत्तराधिकारीसम्बन्धी कानुन प्रतिनिधि सभाले बनाउने, राष्ट्रिय सभा विघटन गर्ने । यसरी नागरिक राजा बनाउने परिकल्पना थियो । त्यो सहमति थियो ।
पछिल्लो समय यहाँमा राजा र राजसंस्थाप्रतिको मोह निकै बढेको देखियो नि ?
- तपाईले यसलाई मोह भन्नुहुन्छ कि विरोध ? देश यति धेरै संकटमा परेको छ । देशलाई जोगाउन सबैखाले राष्ट्रवादी आउनुपर्छ । त्यो सबैखाले राष्ट्रवादी र देशभक्त आउनुपर्छ भनेको त्यो भित्र राजा, देउता र धर्म संस्कृति र परम्परालाई मान्ने पुरातनपन्थी विचार भएकाहरू पनि देशभक्त छन् । उनीहरू पनि देश बनाउन आउँछन् भने उनीहरूलाई रोक्ने हाम्रा अधिकार छैन ।
उनीहरू यहाँले भनेजस्तैगरी आए भने सहकार्य गर्नुहुन्छ ?
- आउन सक्छन् भने डेफिनेटली सहकार्य हुन्छ । हामीले अघि सारेको एजेन्डामा जोजो आउँछन् तिनीहरूसँग सहकार्य हुन्छ । सात सालमा आएको विदेशी हस्तक्षेपलाई राजाले ९०/९५ प्रतिशत रोके । तर, ०४६ पछिको परिवर्तनसँगै आएको हस्तक्षेपलाई दलहरूले रोकेनन् बरु बढावा दिए । देश भडखालोमा परेको छ । देश जोगाउन एक रंगको पार्टीबाट मात्रै सम्भव छैन । राजनीतिक दलका नेता विदेशमुखी भएका छन् । सबै दलका स्थापित नेतृत्व विदेशमुखी बनेका छन् ।
भनेको अब ज्ञानेन्द्र शाह मात्र देशभक्त बाँकी रहे ?
- राजा, देउवा, धर्म संस्कृति मान्ने जो जो छन् । एउटा हलो जोत्ने मान्छे पनि र हिजो शासन चलाउने मान्छे पनि राष्ट्रवादी हो । राष्ट्रवादीहरूले पुरातनपन्थी विचारलाई माने पनि देशको स्वतन्त्रता हुनुपर्छ, नेपाल सार्वभौम रहनुपर्छ, आफ्नो खुसीले प्रणाली परिवर्तन गर्ने अधिकार रहन्छ । यसमा जो पनि आउन सक्छन् । कोको आउछन् हेर्दै जाने कुरा हो । एजेन्डाका आधारमा उनीहरूसँग सहकार्य हुन्छ ।
अमुक आउनुपर्छ, अमुक आउनु हुँदैन हामी भन्दैनौँ । अमुक आऊ देश बचाऊ पनि हामी भन्दैनौँ । अमुक आए प्रतिगमन हुन्छ भन्ने पक्षमा पनि हामी छैनौँ । संसद्लाई भत्काऊ र जनगणतन्त्र ल्याउ भन्छन्, कतिपयले । तर, त्यो अवस्था अहिले होइन । हामी त्यसमा पनि छलफल गरौँला ।
भनेपछि अब पछाडि फर्किने निष्कर्षमा पुग्नुभयो ?
- पछाडि फर्किको होइन, यो आवश्यकता हो । अहिले भएका कुनै पनि विश्वका कम्युनिटीले धर्म निरपेक्षता घोषणा गरेका छैनन् । यद्यपि पार्टीको धर्ममा आस्था छैन । यसले साम्राज्यवादी, कल्चरल र पहिचानमा हस्तक्षेप भएको हुनाले मार्क्सवादमा भए पनि त्यो नेपालमा लागु गर्न अनुपयुक्त छ । यसले मुलुकलाई बलियो होइन, कमजोर बनाउँछ । विभाजन गर्छ । मार्कुवादमा भएका शतप्रतिशत कुराहरू कुनै पनि मुलुकमा लागू हुँदैन । हेरेर गर्ने कुरो हो । नेपालमा नेपालमुखी ढंगले मार्क्सवाद लागू गर्नुपर्छ ।
राजाको अहिलेको जुन रिलाइजेसन छ यो ऐतिहासिक आत्मालोचना हो । मैले यसलाई ऐतिहासिक भन्छु । यो कुरा महेन्द्रको पालादेखि महसुस भएको भए सायद राजा, राजसंस्था, दल र जनता धेरै निकट हुन्थ्यौँ । विदेशीले खेल्न पाउने थिएन । एत्रो नाटक गर्न पाउने थिएन । उत्रो ७२ वर्ष पार गर्यौँ । दुःख कष्ट बलिदान दियौँ । तर, लाभ जम्मै विदेशीले लियो । हामीलाई कमजोर बनायो । राजाको विषयमा छलफल भइरहेको छ । विवादित बनाइएको छ । म यसलाई ठीकै ठान्छु । राजसंस्थाबेगर प्रजातन्त्र पनि चल्दैन भन्नुभयो । यो उहाँको आत्मालोचना हो । यो बहसको विषय हो । कस्तो राजसंस्था, कस्तो प्रजातन्त्र ? राजाले फेरि हिजोजस्तै तासको जुँगाजस्तो राजा खोजेको हो कि ? के खोजेको हो ? कस्तो राजा र कस्तो प्रजातन्त्र खोजेको प्रष्ट भएको छैन । बहसमा जाओस् । म यसलाई सकारात्मक लिन्छु । राजा ज्ञानेन्द्रबाट दसैंमा आएको अभिव्यक्ति ऐतिहासिक हो ।
नेतृत्व हस्तान्तरण कहिले गर्नुहुन्छ ?
- बूढो हुने बित्तिकै मान्छे खत्तम भयो । युवा हुने बित्तिकै शिवजीजस्तो काम गर्छ भन्ने कुरा झुटो हो । नेता नेतृत्व र नीतिबाट आएछ । नीति वस्तुस्थिति र सिद्धान्तलाई जोडेर बन्छ । त्यस्तो नीति बनाउने र लागू गर्ने अनुभवी मान्छे नेता हो । नेता चाहिँ देउसी भैलोको टिम छानेजस्तो होइन । दाइँ गर्ने मान्छेको गोरु बदलेजस्तो होइन । सही नीति बनाउने र देश चलाउने काममा अनुभव पाएको, जनताले विश्वास गरेको मान्छे हो । त्यो चाहे बूढो वा नौजवान होस् । नेता प्रक्रियाबाट आउँछ , कसैले भने जस्तो पुस्तान्तरणबाट आउँदैन । त्यस्तो नेता पैदा नगरीकन नेतृत्व छोड्नु भनेको पनि गलत हो । नेतृत्व दिनु पनि गलत र गैरजिम्मेवार कुरा हो ।
प्रचण्ड, चित्रबहादुर केसी, मोहनविक्रम सिंह वा नारायणमान विजुक्छेको मान्छेले जसरी नाम लिन्छन्, लामो समय नेतृत्वमा आफै बस्ने प्रवृतिका रूपमा त्यसमा अब यहाँको पनि नाम त आउने भयो नि ?
- उहाँहरूको पक्षको कुरा उहाँलाई भन्नुहोला । मैले माथि पनि भने नेता भनेको नेतृत्वबाट आउँछ । नेतृत्व र नीतिबाट आएछ । नीति वस्तुस्थिति र सिद्धान्तलाई जोडेर बन्छ । त्यस्तो नीति बनाउने र लागू गर्ने अनुभवी मान्छे नेता हो । सुरुमा सेन्टिमेन्टल्ली लागे, अहिले मैले धेरै कुरा बुझे । नीतिमा मार्क्सवाद मान्छु । यो आउटडेटेट भएको छैन । यसलाई नेपालको सन्दर्भमा प्रयोग गर्नुपर्छ । गायत्री मन्त्रजस्तो होइन । नेपालको परिवर्तनसँग जोडेर सिजनात्मक प्रयोग गर्नुपर्छ । म आन्दोलनमा लागेर नै केही सिक्दैछु । तातै खाऊँ जलिमरी जाउँ भन्नु हुँदैन ।
कमेन्ट गर्नुहोस्
Sign in with
Facebook Googleकमेन्ट पढ्नुहोस्
0 प्रतिकृया