‘ब्रम्हास्त्र भाग २’ मा ऋतिक महादेव, दीपिका पार्वती !

मुम्बई - सेम्टेम्बरमा रिलिज हुने तरखरमा रहेको फिल्म ‘ब्रहास्त्र’ ‘केशरिया’ गीतका कारण चर्चामा छ । फिल्मको ट्रेलर दिलाउन नसकेको चर्चा यो फिल्मको गीतले दिलाएको छ । तर फिल्मको प्रचारका लागि हो वा साँच्चिकै दोस्रो भागको तयारीका लागि हो, यो फिल्म दोस्रो भाग नबन्दै चर्चामा छ ।

चर्चामा रहने कारण हो, दोस्रो भागका लागि निर्देशक आयान मुखर्जीले छानेका कलाकार । केही दिनअघि फिल्मको दोस्रो भागका लागि निर्देशक मुखर्जीले पार्वतीको भूमिकाका लागि दीपिका पादुकोनसँग कुरा अगाडि बढाइरहेको र फिल्म खेल्ने विषयमा दीपिका पनि इच्छुक रहेको समाचार आएका थिए ।

---

तर बलिउड हंगामाले लेखेको समाचारअनुसार दोस्रो भागमा दीपिकाको जोडीको रुपमा महादेवको भूमिकाका लागि ऋतिक रोशनसँग कुरा भइरहेको छ र ऋतिक पनि आयान मुखर्जीको फिल्मलाई लिएर उत्सुक बनेका छन् । तर बलिउड हंगामा लेख्छ, ‘ऋतिकलाई फिल्मको कथा रोचक लागे पनि उनले फिल्म गर्ने नगर्ने विषयमा ठोस जवाफ दिएका छैनन् । आयान मुखर्जी ऋतिकको उत्तरको प्रतीक्षामा छन् ।’

त्यसो त ऋतिक र दीपिकाले यसअघि नै ‘वार’ निर्देशक सिद्धार्थ आनन्दको ‘फाइटर’मा काम गर्ने सम्झौता गरिसकेका छन् । अब पहिला ‘फाइटर’ फ्लोरमा जान्छ कि ‘ब्रहास्त्र २’ कुनै जानकारी छैन तर यो खबरले बलिउड भने तरंगित भएको छ । ऋतिकले भर्खरै ‘विक्रम बेधा’को सुटिङ सकाएका छन् भने ‘वार २’ र ‘क्रिस ४’ उनले सम्झौता गरेका फिल्म हुन् ।