काठमाडौँ-  गायक निश्चल नेपाल र गायिका रचना रिमालको स्वरमा ‘एक्का बादशाह’ बोलको गीत काठमाडौंमा एक पत्रकार सम्मेलनको आयोजना गरि सार्वजनिक गरिएको छ । नविन कार्कीको संगीत रहेको गीतमा डीपी खनालको शब्द छ । रचनासँगै गायक निश्चलले गीतमा गज्जबको स्वर भरेका छन् ।

रोमान्टिक यो गीतलाई माइकल चन्दले निर्देशन गरेका हुन् । माइकल स्टेप अप एन्ड आट्र्स एकेडेमीको कोरियोग्राफीमा तयार भएको गीतको भिडियोमा अनु शाह, म्याक्स नेपाल, उषा उप्रेति र रमेश विश्वकर्माले अभिनय गरेका छन् । ज्ञानेन्द्र शर्माको छायांकन रहेको भिडियोमा शिलन लम्सालको सम्पादन छ ।

कार्यक्रममा बोल्दै निर्देशक चन्दले यो गीतमा युवा युवतीले एक अर्कालाई एक्का र बादशाह भनेर परिचय गराएको बताए । भिडियोलाई गीतको भाव अनुसार नै तयार पारिएको उनको भनाई थियो ।

नायिका अनु शाहले भिडियोमा आफूले पुरा मिहिनेत गरेर नृत्य गरेको सुनाइन् । मोडल उषा उप्रेतिले पनि भिडियो निकै राम्रो बनेको बताउँदै आफूहरुको मिहिनेतलाई दर्शकले साथ दिनेमा विश्वास व्यक्त गरिन् ।

मोडल म्याक्स नेपालले प्रवासमा रहेर नेपाली गीतसंगीतमा सक्रिय रहन केही समस्या भएपनि आफूलाई दर्शकले माया गरिदिएकोमा खुशी व्यक्त गरे ।