ओलीलाई भेट्‍न नेकपाका पाँच सचिवालय सदस्य बालुवाटारमा

फाइल तस्बिर

काठमाडौं : नेपाल कम्युनिस्ट पार्टी (नेकपा) का कार्यकारी अध्यक्ष पुष्पकमल दाहालसहितका पाँच सचिवालय सदस्य अध्यक्ष केपी शर्मा ओली भेट्न बालुवाटार पुगेका छन् ।  शनिबार बिहान धुम्बाराहीस्थित पार्टी केन्द्रीय कार्यालयमा अनौपचारिक छलफल गरेपछि उनहरु ओलीलाई भेट्न बालुवाटार पुगेका हुन् ।

ओलीलाई भेट्न अध्यक्ष पुष्पकमल दाहाल, नेता माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठ बालुवाटार पुगेका छन् ।

शुक्रबार बसेको सचिवालयको अनौपचारिक बैठकले सदस्यहरूले सामूहिक रुपमै सचिवालय बैठक आग्रह गर्ने निर्णय गरेका थिए । अध्यक्ष दाहालले बोलाएको बैठकमा प्रधानमन्त्री तथा अर्का अध्यक्ष केपी शर्मा ओली पक्षधर नेताहरु भने बैठकमा उपस्थित भएका थिएनन् । बैठकमा अध्यक्ष पुष्पकमल दाहाल, नेता माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठ उपस्थित थिए । अर्का अध्यक्ष ओलीसहित महासचिव विष्णु पौडेल, सदस्य रामबहादुर थापा र ईश्वर पोख्रेल भने बैठकमा उपस्थित थिएनन् ।