मधेस प्रदेशसभाको आठौँ अधिवेशन अन्त्य

जनकपुरधाम– मधेस प्रदेश सभाको आठौं अधिवेशन अन्त्य भएको छ । प्रदेश सरकारको सिफारिसमा प्रदेश प्रमुख हरिशंकर मिश्रले प्रदेशसभाको आठौँ अधिवेशन अन्त्यको घोषणा गरेका हुन ।

मंगलबार बसेको प्रदेशसभाको दोस्रो बैठकमा सभामुख सरोजकुमार यादवले प्रदेश प्रमुखबाट प्राप्त पत्र पढेर अधिवेशन अन्त्य भएको जानकारी गराएका हुन् ।
मधेस सरकारको सिफारिसमा प्रदेश प्रमुख मिश्रले नेपालको संविधानको धारा १८३ को उपधारा २ बमोजिम मंगलबार राति १२ बजेदेखि आठौँ अधिवेशन अन्त्य गरेका हुन् ।

प्रदेश सभाको आठौँ अधिवेशन मंसिर २९ गतेदेखि सुरु भएको थियो । अधिवेशनको चार महिनाको अवधिमा २० वटा बैठकमा सरकारबाट तीनवटा विधेयक दर्ता भएको छ भने चारवटा विधेयक सभाबाट पारित भएको छ । त्यस्तै एक विधेयक प्रमाणीकरण भएको हो ।

आठौँ अधिवेशनमा मंगलबारको दोस्रो बैठकबाहेक २८ घण्टा चलेको सभामुख यादवले सदनमा जानकारी गराए । मंगलबार बसेको बैठकबाट मधेस सरकारले ल्याएको दुईवटै अध्यादेशको प्रतिस्थापन गर्न ल्याइएको विधेयक सर्वसम्मतले पारित गरिएको छ ।

मधेश प्रदेश सरकारले ल्याएको अध्यादेशलाई प्रतिस्थापन गर्न ल्याइएको विधेयक सर्वसम्मतले पारित भएको भएको सभामुख उपमा देवले सदनलाई जानकारी दिएकी हुन् ।

प्रदेश सरकारले ल्याएको अध्यादेश प्रदेश कृषि विश्वविद्यालय अध्यादेश २०७८ र प्राविधिक विश्वविद्यालय अध्यादेश २०७८ लाई प्रतिस्थापन गर्न प्रदेशसभामा विधेयक ल्याइएको थियो ।