जसपाबाट निर्वाचित तीन वडाध्यक्षलाई कारबाही सिफारिस

बुटवल : जनता समाजवादी पार्टी रुपन्देहीले लुम्बिनी सांस्कृतिक नगरपालिकामा पार्टीबाट निर्वाचित तीन जना वडा अध्यक्ष र एकजना कार्यपालिका सदस्यलाई पार्टीबाट निष्कासित गरेको छ । पार्टीले वडा नं ३ का अध्यक्ष अकरामुद्दिन नाउ मुसलमान,वडा नं ६ का अध्यक्ष नैमूल हक मुसलमान, वडा नं ११ का अध्यक्ष अकरामुद्दिन मुसलमान र कार्यपालिका सदस्य अलरख मोहम्मद धुनियालाई पार्टीको साधारण सदस्यसमेत नरहने गरी कारबाही गरेको हो ।

चारै जनालाई पार्टीबाट निश्कासनको कारबाही गर्न जिल्ला समितिले पार्टीको प्रदेश समतिलाई सिफारिस गरेको पार्टीका रुपन्देही इन्चार्ज देवेन्द्र पाण्डे सागरले जानकारी दिए । जिल्लाको सिफारिस प्रदेश समितिमार्फत केन्द्रमा पुगेपछि निर्वाचन आयोगलाई जानकारी गराइने  र आयोगले उनीहरूको पद खारेज हुने कानूनी व्यवस्था छ ।

पार्टी विरोधी गतिविधि गरेपछि पटक-पटक लिखित स्पष्टिकरण लिइएको तर पार्टी विरोधी गतिविधि नरोकिएपछि विधि प्रकृया पूरा गरेर पार्टीबाट निश्कासनको निर्णय गरिएको जिल्ला अध्यक्ष रामअवतार यादवले बताए । लुम्बिनी सांस्कृतिक नगरपालिकाको कार्यपालिकामा मेयर, उपमेयरसहित जसपाको बुहुमत थियो ।

यसविषयमा लुम्बिनी सांस्कृतिक नगरपालिका वडा नं ३ का अध्यक्ष अकरामुद्दिन नाउ मुसलमानले आफुले पार्टी हित विपरित कुनै पनि काम नगरेको बताए । उनले पार्टीका कार्यक्रमहरूमा खबर भएमा सहभागि भएको भन्दै केहि साथीहरू चरित्रहत्यामा लागेको बताए ।