'टिपरमात्र कुदाएर पनौतीलाई विश्‍व सम्पदामा सूचीकृत गर्न सकिँदैन'

मेयरज्यू,

नमस्कार ! 

तपाईं अब आफ्नो कार्यकालको उत्तरार्धमा हुनुहुन्छ । तपाईंको सेवा अवधिमा पनौती क्षेत्रमा धेरै सन्तोषजनक कामको अपेक्षा थियो जनमानसमा, तपाईंबाट धेरै आशा पनि थियो, केही पूरा पनि भए होलान्, त्यस सम्पूर्णको मूल्याङ्कन त अब बाँकी रहेको तपाईंको कार्यकालका कामहरूबाट पनौतीबासीले गर्ने नै छन् ।

मेयरज्यू, विकास मापनको आधारभूतमध्यको विषय भनेको शिक्षा, स्वास्थ्य र यातायत हो । यी क्षेत्रमा पनौती क्षेत्रमा निराशाजनक प्रगति देख्दा हरेक पनौतीबासीलाई उदेक लाग्छ । हजुरले सुरु गर्नु भएको कृषि केन्द्रीत, पाडी वितरण, पार्क र सहिद पार्क निर्माण, उपभोक्ता समितिद्वारा सन्चालित विकास योजना आदि जस्ता काम स्वागतयोग्य छन् । तर, कहीँ कतै हामी प्राथमिकताबाट भड्किए झैँ भान हुन्छ । मेयरज्यू, बाडुली सारै नै लाग्दो होला आजकल तपाईंलाई । मेरो कार्यलय धुलिखेल हो, कार्यलय जाँदा आउँदा तपाईंलाई नसम्झेको दिन छैन । म जस्तै सयौँले तपाईंलाई पक्कै सम्झिन्छन् । कार्यलय जाँदा आउँदा, पनौती बनेपाको सडक खण्ड यात्रा गर्दा यो बाटोको कन्तबिजोग देखेर, बाटोमा सम्हालिन नसकेर दुइपांग्रे भुइँमा बज्रँदा, अनियन्त्रित टिपरबाट ज्यान जोगिँदा र त्यसको धुवाँधुलोले पुरै आँखा, नाक ढाकिँदा, सेताम्य भएर कार्यलय पुग्दा र सेताम्य भएर घर फर्कँदा तपाईंलाई अभिभावक स्वरूप नसम्झिने कोही नहोलान ।

भोलि त होला भन्‍ने आशामा वर्ष नै बित्‍न आँट्यो । तपाईंको  व्यक्तित्वबाट म प्रभावित भएको व्यक्ति हो । टिपर व्यवस्थापन,पौराणिक धर्म संस्‍कृति, शिक्षा र स्वास्थ्य क्षेत्रमा केहि न केहि सुधार होला हुन्छ भन्‍ने मेरो आशा थियो । हाम्राे अनौपचारिक भेटघाट हुँदा तपाईं आश्‍वासनसहितको योजना पनि सुनाउनु हुन्थ्यो । तर, यी  विषयमा एक्दमै निराशाजनक प्रगति देख्दा मन कुँडिन्छ । गुनासाको पोको मात्र खोल्ने भए पनि यो पत्र धेरै लामो होला तसर्थ तपाईंले तत्काल यी यावत विषयमा केही उपयुक्त कदम बढाउनु होला र पनौती बासीको लागि केही भए पनि राहत दिनु हुन्छ भन्‍नेमा विश्‍वस्‍त छु ।

तपाईंले अब आफ्नो निर्भिकता खानी व्यवस्थापन र टिपर व्यवस्थापनमा देखाउनुस्, परापूर्वकालदेखि नै कन्त बिजोग भएको बनेपा-पनौती खण्डको स्थायी व्यवस्थापनको लागि अबधारणा ल्याउनुस्, शिक्षा र स्वास्थ क्षेत्रको विकास‍को लागि जिल्लाको एकमात्र विश्‍वविद्यालयसँग हातेमालो गर्नुस्, पौराणिक धर्म, कला, संस्कृति चाडपर्व । उत्तर प्रयागको (पवित्र त्रिवेणीघाट परिसर)  उचित सम्वर्धनको योजना ल्याउनुस् ।

टिपर कुदाएर पनौतीलाई विश्‍व सम्पदामा सूचीकृत गर्ने आश आफैँमा हाँस्यास्पद छ । हामी सानो छँदा पून्यमाता खोलामा कत्ले, कछे, असला माछा मार्न जान्थ्यौँ । पून्यमाता जीवित थिइ त्यो कालसम्म । पून्यमाता व्यवस्थापनको लागि बनेपा, धुलिखेल नगरपालिका र केन्द्रसँग हातेमालो गर्नुस् । यी यस्ता कामले तपाईंको कार्यकालमा सुरुवात मात्र पाए पनि, तपाईंको कार्यकाल सफल ठहरिने छ । पनौतीको सफल मेयर भनेर इतिहासमा नाम लेखाउन भोलिका दिनमा सिमित स्वार्थभन्दा माथी उठेर, जनभावनामा मल्हम लगाउने काम गर्नु हुनेछ भन्‍ने आशासहित ।

तपाईंको शुभचिन्तक

समिर ताम्राकार