नेपाल-पाकिस्तान मैत्रीपूर्ण क्रिकेट सकियो

काठमाडौँ : नेपाल पाकिस्तान फ्रेन्डसिप टि-ट्वान्टी क्रिकेट प्रतियोगिता सम्पन्‍न भएको छ । पाकिस्तान दुताबासले आयोजना गरेको छैटौं संस्करणको प्रतियोगिता आइतबार सम्पन्‍न भएको हो । धुम्बाराहीस्थित पाकिस्तान दुताबासको मैदानमा भएको प्रतियोगितामा कुल १२ टोलीको सहभागीता रहेको थियो ।

सहभागी टोलीलाई ४ समूहमा विभाजन गरि लिग कप नकआउटका आधारमा प्रतियोगिता संंचालन गरिएको थियो । छैटौं संस्करणको प्रतियोगिताको उपाधि ग्रेट हिमालय क्रिकेट एकेडेमीले जितेको छ । शनिबार भएको फाइनलमा ग्रेट हिमालय क्रिकेटले एन्जल्स हार्ट एकेडेमीलाई १०७ रनले पराजित गरेको थियो । विजेता र उपविजेता टोलीलाई राष्ट्रिय टोलीका कप्तान ज्ञानेन्द्र मल्‍लले मेडल प्रदान गरेका थिए ।

कार्यक्रमको समापन नेपालका लागि पाकिस्तान राजदूत शैयद हैदर शाले गरेका थिए । समापन कार्यक्रममा मुख्य अतिथि युवा तथा खेलकुद मन्त्रालयका सचिव केदार न्यौपाने, अतिथीमा नेपाल राष्ट्रिय क्रिकेट टोलीका कप्तान मल्ल रहेका थिए । खेल समापनमा बोल्दै राजदूत हैदरले आगामी दिनमा पनि यस्ता प्रतियोगिता संचालन गरिरहने बताए । दुई देशबीच आपसी सद्भाव र मैत्रीपूर्ण सम्बन्धका लागि हरेक वर्ष यस प्रतियोगिता हुँदै आइरहेको छ । साेही अवसरमा दूतावासले सहभागी टोली, अफिसियल लगायतलाई करिब २० हजार बराबरको उपहार बाँडेको थियो ।