खुवालुङ संरक्षणका अभियन्ता दिनेश र साजन छुटे

धनकुटा : खुवालुङ संरक्षणमा जुटेका अभियन्ता दिनेश काम्दुङ खुम्बु र साजन राईलाई शुक्रबार प्रहरीले छोडेको छ । सप्तकोशीका डुंगा चलाईरहेकाहरुको उजुरीमा खुम्बुलाई सुनसरी चक्रघाटीको इलाका प्रहरी कार्यालयले बिहीबार खुम्बु र राईलाई पक्राउ गरेको थियो ।

साेमबार खुवालुङ क्षेत्र संरक्षण समितीका सचिव दिला राई, किरात राई विद्यार्थी संघका केन्द्रीय अध्यक्ष रामचन्द्र राई, नेपाल आदिवासी जनजाति महासंघ जिल्ला समन्वय समिती सुनसरी अध्यक्ष राम कुमार मान्डुपा राई, किरात राई यायोक्खा जिल्ला कार्य समिती सुनसरी सचिव राजेन्द्र राई लगायतको समन्वय र रोहबरमा खुम्बु र राईलाई छोडेको हो । 

८  फागुनमा विराटनगर पुगेका प्रधानमन्त्री केपी शर्मा ओलीले उक्त ढुंगा फुटाएर भएपनि कोशीमा जहाज चलाइछाड्ने उद्घोष गरेका थिए । सोमबार यही तमोर, अरुण र दुधकोशीको संगमस्थलमा अभियन्ताहरूले किरातीहरूको सांस्कृतिक स्थल खुवालुङ ढुंगा फुटाउने सरकारी योजनाको विरोध गरेका थिए ।

सोमबार खुवालुङ पुगेर विरोध गर्ने कार्यक्रम थियो । डुंगा व्यवसायीले अभियन्ताहरूलाई खुवालुङ सम्म पुर्‍याउन आलटाल गरेपछि सामान्य विवाद भएको थियो । त्यसपछि डुंगा व्यवसायीको उजुरीको आधारमा बिहीबार प्रहरीले दिनेश र साजनलाई पक्राउ गरेको थियो । शुक्रबार उनीहरू छुटेपछि अभियन्ताहरूलाई खुवालुङ संरक्षणसँग सम्बन्धित विभिन्‍न सरोकारवाला संघ संस्थाहरूका प्रतिनिधिहरूले खादा, माला र अबिर लगाएर स्वागत गरेका थिए । 

किराँत सभ्यता र मुन्दुमका मिथ जोडिएको उक्त ढुंगा उदयपुर, धनकुटा र भोजपुरको सीमानामा पर्छ । वराह क्षेत्र नजिकै रहेको खुवालुङ क्षेत्रमा किराँतहरूले पूजा तथा अनुष्ठान गर्दै आएका छन् ।