दार्चुलाको लेकम गाउँपालिकामा पूर्व असईको हत्या, फरार आरोपी पक्राउ

फाइल तस्वीर

दार्चुला : दार्चुलाको लेकम गाउँपालिकामा एक पुरुषको हत्या भएको छ । जिल्लाको लेकम गाउँपालिका वडा नम्बर ४ टकना बस्ने वर्ष ४८ का पूर्व प्रहरी सहायक निरीक्षक  तेजबहादुर पालको शनिबार राती हत्या भएको  जिल्ला प्रहरी कार्यालय दार्चुलाका सूचना अधिकारी भास्कर चन्दले बताए ।

उनले भने घरभन्दा करिब ५÷६ सय मिटर टाढा  पालको शव फेला परेको थियो । प्रहरीको टोली घट्ना स्थलमा खटि अनुसन्धान गर्दा हत्या भएको खुलाशा भएको हो । सुरुमा रिठाचौपताबाट प्रहरी नायब निरीक्षक लोकेन्द्र पुजारा नेतृत्वको टोली र त्यस पश्चात् इलाका प्रहरी कार्यालय गोकुलेश्वरबाट प्रहरी निरीक्षक खगेन्द्रसिंह साउँदको नेतृत्वमा प्रहरी टोली घट्ना स्थलमा पुगेको थियो ।

 पूर्व प्रहरी सहायक निरीक्षक पालको टाउकोमा लठ्ठीले प्रहार गरेर हत्या गरेको प्रहरीको प्रारम्भिक अनुसन्धानबाट खुलेको डिएसपी पदम बहादुर बिष्टले बताए । फरार रहेका हत्या आरोपी पनि पक्राउ गरिएको छ ।

प्रहरी चौकी सेरा बैतडीको सहकार्यमा फरार रहेका सोही ठाउँका अन्दाजी वर्ष ३०/३२ का रमेश पाल पक्राउ परेका छन् । हत्या गरी फरार रहेका पाललाई आइतबार बिहान करिब साढे ७ बजेतिर पक्राउ गरिएको बिष्टले बताए । रासस