कोरोना भाइरसको नयाँ प्रजाति पहिलेको भन्दा धेरै खतरनाक : जोनसन

लन्डन :  बेलायतका प्रधानमन्त्री बोरिस जोनसनले कोरोना भाइरसको नयाँ प्रजातिको सङ्क्रमण पहिलेको भन्दा धेरै खतरनाक भएको बताएका छन् । पछिल्लो समय बेलायतमा कोरोना भाइरसका सङ्क्रमितहरूको संख्या दिन प्रतिदिन बढ्दै गएको बताइरहेका बेला प्रधानमन्त्री जोनसनले यस्तो बताएका हुन् । 
 
प्रधानमन्त्री जोनसनले भने, 'यो भाइरस पहिलेको भन्दा धेरै नै खतरा छ त्यसैले सबै नागरिकले पहिलेको भन्दा पनि अझ बढी सुरक्षा मापदण्डहरु अपनाउनुपर्ने हुन्छ ।' शुक्रबार डाउनिङ स्ट्रिटमा आयोजित पत्रकार सम्मेलनमा भाइरस पहिलो पटक गत महिनामात्र इंगल्याण्डको केन्टमा देखिएको बताए । उनले नयाँ प्रजातिको भाइरस पुरानो भन्दा कम्तीमा पनि ७० प्रतिशत बढी मात्रामा सक्रमण फैलिने खालको रहेको छ ।
 
 बेलायतमा कोरोना भाइरसको सक्रमणबाट एकैदिनमा १ हजार ८२० जनाको मृत्यु भएको बेलायतका स्वास्थ्य अधिकारीहरूले बताएका छन् । अधिकारीहरूका अनुसार गएको बुधबार मात्र यहाँ त्यति धेरै नागरिकको ज्यान गएको हो । बेलायतमा कोरोना भाइरसको सङ्क्रमण सुरु भएदेखि अहिलेका केही हप्ता यता धेरै जनाको ज्यान जान थालेको अधिकारीहरूको भनाइ थियो । 
 
बेलायतबाट नै सुरु भएको भनिएको कोरोनाको नयाँ स्वरुपको भाइरस विश्‍वका ६० देशमा पुगेको छ । विश्‍व स्वास्थ्य संगठनले बुधबार दिएको जानकारीअनुसार भाइरस गत हप्तामा मात्र विश्‍वका १० वटा देशमा पुगेको हो । 
 
बेलायतको स्वास्थ्य मन्त्रालयका अधिकारीले पनि यो संक्रमण पुरानो भन्दा खतरनाक भएको प्रमाण मिलेको बताएका छन् । उनका अनुसार कोरोना भाइरसको पहिलेको संक्रमणमा १ हजार जना सङ्क्रमितमा १० जनाको ज्यान गएको पाइएको थियो भने यो नयाँ प्रजातिको संक्रमणमा भने एक हजार जना सङ्क्रमितहरुमा १३ वा १४ जनाको नै निधन भएको पाइएको छ ।
 
पछिल्लो समयमा संक्रमण युरोपकै कैयौँ सहरमा पुगिसकेका पाइएको छ । यसका कारण ती देशमा थप सतर्कता अपनाउने गरिएको छ । ती देशमा हाल खोप पनि दिन थालिएकोले नागरिकमा आशा पलाएको छ ।
युरोपेली युनियनले आगामी अगष्ट महिनाको अन्तिम सम्ममा विभिन्‍न युरोपेली देशका करिब ७० प्रतिशत नागरिकलाई यो खोप दिइ सकिने कुरा हालैमात्र जानकारी गराएको छ ।
 
प्रधानमन्त्री जोनसनले यहाँका कम्तीमा पनि ३८ हजार नागरिक सङ्क्रमित भएर अस्पतालमा रहेका बताए । उनले यो नयाँ प्रजातिको भाइरस बेलायतमा प्रवेश गरेपछि यसले पहिलेको भन्दा पनि धेरै मानिसलाई संक्रमित बनाएको बताए । (रासस)