बेरोजगार हुनुहुन्‍छ ? सुब्बामा जागिर खुल्यो

काठमाडौं : नेपाल सरकारको नायब सुब्बा अर्थात नासु पदमा ८ सय ४३ जनाका लागि जागिर खुलेको छ । लोक सेवा आयोगले नासु पदका लागि खुल्लाबाट ४११ र ज्येष्ठता र कार्यक्षमता मूल्यांकन बढुवाबाट ४३२ जना पदपूर्ति गर्ने गरी बुधबार विज्ञापन प्रकाशित गरेको हो ।

काठमाडौं कार्यालयबाट खुलामा १५० जना, ज्येष्ठताबाट ९८ र कार्यक्षमताबाट ४८ गरी जम्मा २९६ जनाका लागि विज्ञापन खुला गरिएको छ । यसैगरी धनकुटा कार्यालयबाट खुलामा ४७ जना, ज्येष्ठताको आधारमा ३१ जना र कार्यक्षमताको आधारमा १८ गरी ९६ जनाका लागि विज्ञापन प्रकाशित गरिएको छ । 

जलेश्वर कार्यालयबाट खुलाबाट ४९ जना, ज्येष्ठताको आधारमा ४९ जना र कार्यक्षमताको आधारमा २३ जना गरी कूल १२१ जना सुब्बाको पदपूर्ति गरिने छ ।

पोखरा कार्यालयबाट खुल्लाबाट ५२ जना, ज्येष्ठताको आधारमा ३५ जना र कार्यक्षमताको आधारमा १७ जनाको पदपूर्ति हुने लोक सेवा आयोगले प्रकाशित गरेको विज्ञापनमा उल्लेख छ । यस्तै बुटवल, सुर्खेत र डोटीमा पनि नासुको पदमा विज्ञापन खुला गरिएको आयोगले जनाएको छ ।