कोभिड–१९ः चीनमा नयाँ संक्रमितको संख्या बढ्यो

काठमाडौं : चीनमा पाँच महिना यताकै सबैभन्दा धेरै कोभिड–१९ (कोरोना भाइरस) का नयाँ संक्रमित देखिएका छन् । चिनियाँ स्वास्थ्य अधिकारीहरुका अनुसार जनवरी १० (आइतबार) मा एक सय तीन नयाँ संक्रमित फेला परेका हुन् । यो संख्या जुलाई ३० यताकै सबैभन्दा ठूलो संख्या हो । जुलाई ३० मा एक सय २७ जनामा कोरोना भाइरस देखिएको थियो । 

चीनको राष्ट्रिय स्वास्थ्य परिषदका अनुसार ८५ संक्रमित स्थानिय र १८ संक्रमित विदेशबाट आएका हुन् । राजधानी बेइजिङसँग जोडिएको राज्य हेबेईमा मात्रै ८२ स्थानिय नागरिकमा संक्रमण देखिएको छ । हेबेईमा संक्रमितको संख्या लगातार बृद्धि भइरहेको रायटर्सले आफ्नो रिपोर्टमा उल्लेख गरेको छ । हेबेई बाहेक हेइलोङजियाङमा पनि संक्रमित बढिरहेको चिनियाँ सरकारी टेलिभिजनले जनाएको छ । 

पछिल्लो समय कोरोना भाइरसबाट संक्रमित हुनेको संख्या सानो भएपनि चिनियाँ अधिकारीहरु यसको नियन्त्रणमा आक्रमक देखिन छाडेका छैनन् । हेबेईको राजधानी सिजियाजहुवाङमा लकडाउन गरिएको छ भने सार्वजनिक यातायात सञ्चालनमा बन्देज गरिएको छ । उता हेइलोङजियाङको वाङकुईमा पनि नयाँ संक्रमितहरु देखिएपछि लकडाउन गरिएको छ ।  

चीनमा कोरोना भाइरसको संक्रमणमा पर्नेको संख्या कुल ८७ हजार ५ सय ३६ पुगेको छ भने मृत्य हुनेको संख्या चार हजार ६ सय ३४ रहेको छ ।