ट्रम्पलाई महाअभियोग लगाउने डेमोक्र्याटको तयारी

हिंसालाई प्रोत्साहन गरेको आरोपमा अमेरिकी राष्ट्रपति डोनाल्ड ट्रम्पमाथि फेरि महाअभियोग लगाउने प्रस्तावमाथि मतदान हुने सम्भावना बढेको छ । अमेरिकी संसदको तल्लो सदनमा मंगलबार नै ट्रम्पविरुध्दको महाअभियोग प्रस्तावमाथि मतदान हुने सम्भावना बढेको डेमोक्र्याट सांसदहरुले बताएका छन् ।

ट्रम्पमाथि यसअघि फोन ट्रयाप गरेको आरोपमा पनि महाअभियोग लागेको थियो । महिलामाथि यौन दुर्व्यवहारको चर्को आरोप खेपिरहेका बेला ट्रम्पले युक्रेनका राष्ट्रपतिसँग गरेको फोन संवाद विवादमा परेपछि महाअभियोगको सामना गर्नुपरेको थियो । यसपटक पनि मतदान प्रक्रिया अगाडी बढेमा अमेरिकी इतिहासमै ट्रम्प एकै कार्यकालमा दोस्रोपटक महाअभियोग सामना गर्ने पहिलो राष्ट्रपति बन्नेछन् । 

तल्लो सदनमा डेमोक्र्याट सांसदहरुले ट्रम्पविरुध्द हिंसा मच्चाएको आरोप लगाएका छन् । नयाँ राष्ट्रपति जोय बाइडेनले शपथ लिने दिन नजिकै आउँदा ट्रम्पले आफ्ना समर्थकलाई संसद भवनभित्र छिरेर हिंसा भड्काउन भूमिका खेलेको डेमोक्र्याटहरुको आरोप छ ।

ह्वाइट हाउसले भने ट्रम्पविरुध्दको महाअभियोग प्रस्ताव खारेज गरेको छ । तर रिपब्लिकनलाई थप कमजोर बनाउन महाअभियोग प्रस्तावमाथिको मतदान प्रक्रियालाई अगाडी बढाउनुपर्ने डेमोक्र्याटका वरिष्ठ सांसदहरुको भनाई छ । 

यसअघि ट्रम्पविरुद्धको महाअभियोग प्रस्ताव तल्लो सदनबाट पारित भएपनि अमेरिकी सिनेट अर्थात माथिल्लो सदनबाट अस्वीकृत भएको थियो । माथिल्लो सदनमा रिपब्लिकनको बहुमत छ । दोस्रो महाअभियोग प्रस्ताव तल्लो सदनबाट पारित भए यसपटक पनि सिनेटबाट पारित हुन सहज छैन् । 

गएको बुधबार अमेरिकी संसदबाहिर ट्रम्पका समर्थकले हिंसा भड्काउँदा पाँच जनाको मृत्यु भएको थियो । रिपब्लिकन समर्थक जबर्जस्ती संसद भवनभित्र छिर्न खोज्दा प्रहरीसँगको झडपमा पाँच जनाको मृत्यु भएपछि ह्वाइट हाउसबाट बाहिरिन लागेका ट्रम्पको थप आलोचना चुलिएको छ । 

हिंसालाई प्रोत्साहन गरेको आरोपमा सामाजिक सञ्जाल फेसबुक र ट्वीटरले समेत ट्रम्पको आधिकारिक खाता नै बन्द गरेका छन् । बीबीसी