ब्राजिलका राष्ट्रपतिले मागे मोदीसँग कोरोना खोप

काठमाडौं : ब्राजिलका राष्ट्रपति जाइर बोलसोनारोले भारतीय प्रधानमन्त्री नरेन्द्र मोदीलाई कोभिड-१९ (कोरोना भाइरस) को खोप शिघ्र उपलब्ध गराइदिन आग्रह गरेका छन् । मोदीलाई शुक्रबार पत्र लेख्दै बोलसोनारोले एस्ट्राजेनेकाले विकास गरेको खोपको निर्यातलाई सहजिकरा गरिदिन आग्रह गरेका हुन् । 

कोभिड-१९ बाट सर्वाधिक प्रभावित हुने मुलुकमध्येको एक ब्राजिलमा राष्ट्रपति बोलसोनारो चाँडो भन्दा चाँडो खोप वितरण गर्नुपर्ने दबाब छन् । एस्ट्रोजेनेकाले विकास गरेको खोप भारतमा सेरुम इन्सच्ट्यिुटले उत्पादन गरिरहेको छ । सोही खोप ब्रजिलतर्फ निर्यात गर्न लागिएको हो । तर निर्धारित समयमा निर्यात हुन नसकेपछि बोलसोनारोले मोदीलाई पत्र लेख्नु परेको हो । 

ब्राजिलमा बोलसोनारोले कोरोना भाइरसको खोप नागरिकलाई उपलब्ध गराउन नसकिरहेको भनेर आलोचना खेपिरहेको बेला उनले भारतीय प्रधानमन्त्रीलाई लेखेको पत्र सार्वजनिक गरिएको हो । बोलसोनारोका विपक्षी र जन स्वास्थ्य विज्ञहरूले ब्राजिलमा खोपको वितरणमा ढिलाइ भइरहेको भन्दै विरोध गरिरहेका छन् । 

‘भारतको आफ्नै खोप वितरण गर्ने कार्यक्रममा असर नपर्ने गरी ब्राजिलका लाागि तत्काल २० लाख डोज उपलब्ध गराउन आग्रह गर्दछु ।’ बोलसोनारोले पत्रमा लेखेका छन् । 

हिन्दुस्तान टाइम्सबाट