अमेरिकी संसद्‍मा के-के भयो ? भिडियो र तस्बिरमा हेर्नुहोस्

तस्बिर : एपी

अमेरिकामा राष्ट्रपति डोनाल्ड ट्रम्पका समर्थकहरूले संसद् भवन क्यापिटलमा पसेर हङ्गामा गरेका छन् । अमेरिकी कङ्ग्रेसमा सांसदहरूले जो बाइडनको जितको पुष्टि गर्न छलफल गरिरहेका बेला यस्तो हङ्गामा भएको हो ।

सदनमा बहस चलिरहेकै बेला अचानक ट्रम्प समर्थकहरू क्यापिटलभित्र प्रवेश गरेका थिए ।

ट्रम्प समर्थकहरू चुनावी परिणाम रद्द गर्न माग गर्दै प्रदर्शनरत थिए । त्यसक्रममा केही प्रदर्शनकारी र प्रहरीबीच हिंसक झडप पनि भएका छन् । एक महिलालाई गोली लागेको छ । द वासिङ्टन पोस्ट र सीएनएनका अनुसार अस्पतालमा उपचारको क्रममा ती महिलाको मृत्यु भएको हो । हिंसक गतिविधिपश्चात् वासिङ्टन डिसीमा कर्फ्यू लगाइएको छ । कर्फ्यू बुधबार बेलुका ६ बजेदेखि बिहिबार बिहानसम्म लागू गरिएको छ । (एपीबाट)