नक्कली नोट बनाउन प्रयोग हुने कागजसहित दुई जना पक्राउ

महोत्तरी – नक्कली नोट बनाउन प्रयोग हुने कागजसहित दुई जना पक्राउ परेका छन् । पक्राउ पर्नेमा धनुषा जिल्लाको लक्ष्मीनिया गाउँपालिका १ बस्ने २३ वर्षीय असरक माेहम्मद धोबी र सोही जिल्लाको जनकपुर उपमहानगरपालिका ६ बस्ने
२६ वर्षीय मोहम्मद मुजाहिद रेजा रहेका छन् ।

जलेश्वर नगरपालिका ३ स्थित सीमा इलाकाबाट आइतबार सशस्त्र प्रहरीले नक्कली नोट बनाउन प्रयोग हुने ३३ बण्डल कागजसहित उनीहरुलाई पक्राउ गरेको हाे ।

बा २१ च ६७६१ नम्बरको कारमा सवार उनीहरुलाई सशस्त्र प्रहरी बल नेपाल बोर्डर आउट पोष्ट जलेश्वरबाट खटिएको सशस्त्र प्रहरीले शंका लागि जाँच गर्दा एक हजारको ६ सय वटा, पाँच सयको १८ सय वटा र एक सयको ९ सय वटा कागज फेला पारेकाे हाे ।

त्यस्तै उनीहरुकाे साथबाट एक हजारको २ वटा, पाँच सयको २ वटा र एक सयको २ वटा नेपाली नोटसमेत प्रहरीले बरामद गरेकाे छ। पक्राउ परेका दुवै जनालाई बरामद रुपैयाँ, नक्कली नोट छाप्ने कागज तथा कारसहित आवश्यक कारवाहीको लागि नेपाल प्रहरीलाई बुझाइएको छ ।