आईएमएफबाट नेपालका लागि झन्डै ४७ अर्बको ऋण स्वीकृत

काठमाडौँ– अन्तर्राष्ट्रिय मुद्रा कोष (आईएमएफ)ले नेपालका लागि ३९ करोड ५९ लाख अमेरिकी डलरको ‘एक्सटेन्डेड क्रेडिट फेसिलिटी’ भनिने एक ऋण प्रस्तावलाई स्वीकृत गरेको छ । यो झन्डै ४७ अर्ब रुपैयाँ बराबरको ऋण हो । 

गत डिसेम्बर महिनामा आईएमएफको सञ्चालक समतिमा उक्त प्रस्ताव पठाइएको थियो । आईएमएफको सञ्चालक समितिले बिहीबार यो ऋण सुविधाको प्रस्ताव स्वीकृत गरेको हो । नेपालले विदेशी विनिमय सञ्चितिमा बढ्दो चाप र कोभिड–१९ पछिको आर्थिक पुनरुत्थानलाई समेत दृष्टिगत गरेर यो ऋण सुविधा उपयोग गर्न लागेको हो । आईएमएफले स्वीकृत गरेको ऋणमध्ये ७ करोड ८५ लाख स्पेसल ड्रइङ्ग राइट्स (एसडीआर) अर्थात् ११ करोड अमेरिकी डलर तत्काल निकासा हुनेछ । 

यो ऋण सुविधा ३८ महिनाका लागि हुनेछ र यसले खासगरी कोरोना भाइरस महामारीले मानव स्वास्थ्य र अर्थतन्त्रमा पारेका नकारात्मक प्रभाव न्यूनीकरणस्वरूप जोखिममा रहेका समूहको संरक्षण, समष्टिगत र वित्तीय स्थायित्वको सुनिश्चितता तथा दीगो आर्थिक विस्तार र गरिबी निवारणमा टेवा पुर्‍याउने सुधारका एजेन्डालाई सहयोग गर्नेछ ।

यो कार्यक्रम अन्तर्गत राजस्व वृद्धिका उपायहरू तथा सार्वजनिक खर्चको कार्यदक्षता सुधार, वित्तीय क्षेत्रको नियमन र सुपरिवेक्षणको को सुदृढीकरण तथा बजेट पारदर्शीता अभिवृद्धी गर्दै सुशासन कायम गर्ने र भ्रष्टाचार नियन्त्रणमा महत्वपूर्ण भूमिका निर्वाह गर्ने आइएमएफले उल्लेख गरेको छ ।