माओवादी प्रदेश १ अधिवेशन : यी हुन् अध्यक्षमा तीन आकांक्षी

विराटनगर- नेकपा माओवादी केन्द्र प्रदेश १ को अधिवेशन आज सुरू हुँदैछ । प्रदेश राजधानी विराटनगरभन्दा २२ किलोमिटर टाढा सुन्दरहरैंचाको विराटचोकमा प्रदेश अधिवेशनस्थल तोकिएको छ ।

पहिलो अधिवेशनका लागि प्रदेश १ का १४ जिल्लाबाट करिब १ हजार १ सय प्रतिनिधिहरू सहभागी गराएर माओवादीले अधिवेशन गर्न लागेको हो । 

नेता प्रधानभन्दा नीति प्रधान नेतृत्व निर्माणमा जोड दिएकोले अधिवेशनमा सहमतिबाट नेतृत्व चयन गर्न दबाब नदिइने जनाइएको छ । माओवादी केन्द्रका प्रदेश १ इन्चार्ज राम कार्कीले नेतृत्व चयनका लागि सहमति नै हुनुपर्छ भनेर नेतृत्वले कहिल्यै पनि नभनेको बताएका छन् ।

पहिलो प्रदेश अधिवेशनबाट अध्यक्ष बन्न अहिलेसम्म तीन आकांक्षीहरू मैदानमा देखिएका छन् । अध्यक्षका लागि उदयपुरका संघीय सांसद एवं प्रदेश समितिका वर्तमान अध्यक्ष हिमाल राई, प्रदेश सचिव हेमराज भण्डारी र प्रदेश १ का आर्थिक मामिला तथा योजनामन्त्री इन्द्रबहादुर आङ्बो आकांक्षी देखिएका हुन् ।

उनीहरू पार्टीभित्र आ-आफ्नो लविङमा केन्द्रीत छन् । अधिकांश पार्टीहरूले संविधान अनुसार पार्टीहरूले आफ्नो संगठानिक संरचनालाई संघीयताको मर्म अनुसार लैजाँदैछन् । पार्टीहरूले आफ्ना प्रदेश समितिलाई पनि ‘पावर सेयरिङ’ गरेका कारण नेताहरू प्रदेशमा रहनका लागि तँछाड मछाडमा छन् ।

विशेष गरी स्थानीय तहको टिकट वितरणमा प्रदेश समितिको महत्वपूर्ण भूमिका हुने भएकोले प्रदेश कमिटीमा नेतृत्व गर्न नेताहरूको आकांक्षा बढेको हो ।

माओवादीले एक व्यक्ति एक पदको नीतिलाई प्राथमिकताका साथ अगाडि बढाउने भन्दै आएको छ । प्रदेश कमिटीमा ३५ प्रतिशत महिला, २० प्रतिशत युवा, प्रदेशको जनसंख्याको अनुपातका आधारमा थप दुई प्रतिशत दलित, पाँच प्रतिशत मुस्लिमको सहभागिता सुनिश्चित गरिने जनाइएको छ । 

‘हाम्रो नेतृत्वको सर्वोच्च तहबाट सहमति नै गर्नुपर्छ भनेर कहिले पनि आह्वान गरिएको छैन’ प्रदेश १ का इन्चार्ज राम कार्कीले भने, ‘हामी एमाले वा कांग्रेसको जस्तो संगठन बनाउन चाहँदैनौं, किनभने गणतन्त्र, संघीयता र समावेशी प्रजातन्त्र आज हाम्रै कमिकमजोरीको कारणले पनि क्षय भएको छ ।’