म्याग्दीमा जीप दुर्घटना हुँदा चार जनाको मृत्यु

म्याग्दी - म्याग्दीको रघुग‌गा गाउँपालिका–१ बेगमा जीप दुर्घटना हुँदा चार जनाको मृत्यु भएको छ । बेनीदेखि बेगको सिमतर्फ जाँदै गरेको ग१ज ७२५१ नम्बरको जीप औंलामा दुर्घटना भएको हो । 

प्रहरी निरीक्षक वीरेन्द्रराज गुरूङका अनुसार मृत्यु हुनेमा ३० वर्षीया गौमाया विक, जीप चालक ३५ वर्षीय दुढबहादुर थापा, ३० वर्षीय खिमु पुन र ४५ वर्षीय खिमानन्द शर्मा छन् । उनीहरू  सबै बेगका बासिन्दा हुन् । गौमाया रघुगंगा गाउँपालिका–१ बेगकी निर्वाचित वडा सदस्यसमेत हुन् । पुन र शर्माको घटनास्थलमा तथा चालक थापा र विकको उपचारका लागि बेनी ल्याउँदा बाटोमै मृत्यु भएको प्रहरीले जनाएको छ । 

दुर्घटनामा ५४ वर्षीय बलबहादुर विक, २३ वर्षीय मनोज पुन, २० वर्षीय भीम फगामी र ३० वर्षीय ज्ञानबहादुर शेरपुञ्जा घाइते भएका छन् । उनीहरूलाई उपचारका लागि कास्कीको पोखरास्थित मणिपाल शिक्षण अस्पताल लगिएको छ । जीप सडकदेखि करिब तीन सय मिटर तल खसेको थियो ।