जनकपुरको मिथिला डिपार्टमेन्टल स्टाेरमा भीषण आगलागी

जनकपुरधाम : जनकपुरधामको मिथिला डिपार्टमेन्टल स्टोरमा आगलागी भएको छ । जनकपुरधाम २ शिव चौकस्थित मिथिला डिपार्टमेन्टल स्टोरमा बिहीबार बिहान १० बजेदेखि लागेको आगाे याे समाचार तयार पार्दासम्म नियन्त्रणमा आएको छैन ।

आगो निभाउन नेपाल प्रहरी, नेपाली सेना र सशस्त्र प्रहरीको टोली घटनास्थलमा सक्रिय रहे पनि तीन घण्टाअघि लागेको आयो नियन्त्रणमा आउन सकेको छैन । 
आगो निभाउन धनुषाको क्षिरेश्वरनाथ नगरपालिका, धनुषाधाम नगपालिका, विमानस्थल, महोत्तरीको जलेश्वर नगरपालिका, बर्दिबास नगरपालिकासहित आधा दर्जनभन्दा बढी बारुण यन्त्र परिचालन गरिएको छ ।

आधा दर्जनभन्दा बढी बारुण परिचालन गरिए पनि भीषण आगलागी अहिलेसम्म नियन्त्रणमा आउन नसकेको जिल्ला प्रहरी कार्यालय धनुषाले जनाएको छ । सो आगलागीमा ५ करोडभन्दा बढीको क्षति हुन सक्ने प्रारम्भिक अनुमान रहेको प्रहरीले जनाएको छ । आगलागीमा चिनी, तेल, साबुन, लताकपडा, परफ्युम लगायतका घरायसी सामाग्रीहरु ठूलो मात्रामा जलेर नष्ट भएको प्रहरीले जनाएको छ ।

आगो निभाउने क्रममा आधा दर्जनभन्दा बढी शसस्त्र र नेपाल प्रहरी घाइते भएका छन् । सुरुमा बारुण यन्त्र नआएको र प्रहरीले बाल्टीमा पानी लिएर आगो निभाउने क्रममा उनीहरू घाइते भएको जिप्रका धनुषाका प्रहरी उपरीक्षक रमेश बस्नेतले बताए ।

यसैबीच स्थानीय व्यवसायी र युवाहरूले जनकपुरधाम उपमहानगरपालिकाको लापरवाहीको कारण सामान्य आगलागी भीषण आगलागीमा परिणत भएको आरोप लगाएका छन् । उपमहानगरपालिका जस्ता निकायमा २/२ वटा वारुण यन्त्र भए पनि एउटा पनि संचालनमा नरहेको कारण बाहिरबाट वारुण यन्त्र मंगाउन समय लागेको कारण भीषण आगलागी भएको स्थानीयको आरोप छ । उनीहरूले उपमहानगरपालिका घेराउ गर्दै मेयर मेयर लालकिशोर साहविरुद्ध नाराबाजीसमेत गरेका छन् ।