इ-पासपोर्टको पहिलो प्रति शताब्दी पुरुष सत्यमोहन जोशीलाई

काठमाडौँ - सरकारले इ-पासपोर्टको पहिलो प्रति शताब्दी पुरुष सत्यमोहन जोशीलाई प्रदान गरेको छ । राहदानी विभागले बुधबार सार्वजनिक गरेको इ–पासपोर्ट परराष्ट्रमन्त्री नारायण खड्काले जोशीलाई प्रदान गर्दै पासपोर्टको औपचारिक सुरुवात गरेका हुन् । 

पहिला हस्तलिखित पासपोर्ट बोक्नुपर्दाको झण्झट सम्झँदै इ-पासपोर्टले सहज हुने कार्यक्रममा जोशीले बताए । उनले अब पासपोर्टको सबै काम अनलाइनमार्फत हुने बताउँदै सेवाग्राहीलाई झण्झट पनि नहुने र अब विदेश यात्रा गर्दा नेपालीले अन्य देशको पासपोर्ट बाहकभन्दा फरक व्यवहारको सामना गर्नुनपर्ने बताए ।

राहदानी विभागका महानिर्देशक डोरनाथ अर्यालले संसारमा अब नेपालको पासपोर्ट विश्वासयोग्य हुने दाबी गरे । ‘हस्तलिखित पासपोर्टबाट इ–पासपोर्टसम्म पुग्नु नेपालका लागि सफलताको विषय हो,’ अर्यालले भने । विभागसँग एक घण्टामा एक हजार इ–पासपोर्ट छाप्ने क्षमता रहेको उनले बताए ।

हरियो रंगको पासपोर्ट पाउँदै आएका सर्वसाधारणले अब हलुका खैरो रङको पासपोर्ट पाउने छन् । कूटनीतिक राहदानी रातो रंगको रहँदै आएकोमा अब सिम्रिक रातो रंगको हुने उनले जानकारी दिए । योसँगै विभागले कूटनीतिक, विशेष, अस्थायी, सिम्यान्स अभिलेख किताब, साधारणअन्तर्गत ३४ र ६६ पृष्ठको गरी ६ प्रकारका पासपोर्ट जारी गर्दै आएकोमा अब सर्भिस पासपोर्टसमेत थपेर सात प्रकारको इ-पासपोर्ट दिने भएको छ।