सात बुँदे सहमतिपश्चात जनकपुरमा निषेधाज्ञा हटाइयो

जनकपुरधाम – जनकपुरधाम उपमहानगरपालिका– २० देवपुरा रुपैठामा लगाइएको निषेधाज्ञा हटाइएको छ । दुई समुदायबीच सहमतिपश्चात निषेधाज्ञा हटाइएको हो । सोमबार दई समुदायबीच भएको छलफलमा सात बुँदे सहमति भएपछि निषेधाज्ञा हटाइएको जिल्ला प्रशासन कार्यालय धनुषाले जनाएको छ ।

सहमतिमा स्थानीय तेलिया पोखरी अबदेखि उपमहनरपालिकाको अधिनमा रहने, उक्त पोखरीको व्यवस्थापन तथा संरक्षण उपमहनरपालिकाले नै गर्ने, हिन्दूको छठ र मुस्लिमको दाहाजस्ता पर्व प्रशासनलाई पूर्वजानकारी गराई पोखरीमा माटो नझर्ने गरी गर्ने, मुस्लिम समुदायले त्यहाँ गाडेको झण्डा अन्य स्थानमा व्यवस्थापन गर्ने, दुवै समुदायले एकअर्कालाई सम्मान गर्नेलगायतका सहमति भएको छ ।

त्यसैगरी उक्त सहमति कार्यान्वय गराउन उपमहनगरपालिका उपमेयर रीताकुमारी मिश्रको संयोजकत्वमा दुवै समुदायबाट चार–चार जना प्रतिनिधि रहने गरी समितिसमेत गठन गरिएको छ ।