वृद्ध भत्‍ता लिन बिहानैदेखि लाइनमा

कैलाली - सरकारले ज्‍येष्‍ठ नागरिक, एकल महिलालगायत लक्षित समूहका व्यक्तिलाई भत्ता उपलब्‍ध गराउँदै आएको छ । बुढेसकालमा केही राहत होस् भनेर सरकारले उपलब्ध गराउदै आएको बृद्ध भत्ता बुझ्न भने लक्षित समूहलाई समस्या हुने गरेको छ । वृद्ध, अपांग, एकल महिलालगायतका भत्ता लिन बैंकमै धाउनु पर्ने बाध्यता भएपछि उनीहरूलाई समस्या भएको हो ।

बैंक १० बजे खुल्ने भए पनि सबेरै लाइन लाग्न बैंक पुग्ने गरेको गौरीगंगा नगरपालिका-२ कि सीतादेवीले बताइन् । उनले अलि ढिलो भयो भने त पालो नै आउदैन भन्दै सरकारले दिने भत्ता वृद्धवृद्धालाई घर घरमै पुर्‍याउने व्यवस्था गरिदिन आग्रह गरिन् ।

सीता जस्तै वृद्ध अवस्थाका थुप्रै महिला तथा पुरुषहरू बिहानै बैंक पुग्ने गरेका छन् । गौरीगंगा नगरपालिकाको मसुरिया बजारमा रहेको एनआइसी एसिया बैंकमा भत्ता बुझ्ने दिन सबेरै यस्तै लाइन सधैजसो देख्न सकिने गौरीगंगा नगरपालिका ६ का बुधराम चौधरीले बताए । उनले बैंक भुईँ तलामा भए सहज हुने बताउदै एकतलामाथि उक्लिन समस्या हुने गरेको बताए ।

उनले पनि सीताले जस्तै अझै घरघरमै उपलब्ध भए सहज हुने प्रतिक्रिया दिए । सरकारले उपलब्ध गराएको भत्ताले दैनिकीमा केही सहज भएको बताउदै मसुरियाका नाथुरामले जाडोको महिनामा भत्ता लिन आउन निकै समस्या हुने गरेको बताए । उनले जाडो त्यस्तैमाथि घन्टौ लाइन बस्नु पर्दा कतिपय बिरामीसमेत हुने गरेको बताए ।