वरिष्ठ साहित्यकार बजिमयको निधन

काठमाडौँ – वरिष्ठ साहित्यकार एवम् चर्चित कवि प्राज्ञ विजय बजिमयको आइतबार निधन भएको छ । शारीरिकरूपमा जन्मजात अपांग भए पनि कविता, कथा, गीत, गजल तथा मुक्तकका माध्यमबाट नेपाली साहित्यलाई विशिष्ट योगदान दिएका बजिमय ०१४ साल चैत २३ गते पोखराको मोहरिया टोलमा जन्मिएका थिए ।

०२९ सलमा ‘प्रजातन्त्र’ नामक कविताबाट लेखन सुरू गरेका लोकतान्त्रिक स्रष्टा बजिमयको ‘समय भनेको समय हो’ (कविता संग्रह),  ‘अन्त्वत्तोगत्वा’ (कथा संग्रह) प्रकाशित छन् भने केही कृति प्रकाशनको तयारीमा पनि छन् । 

कवि कृसु क्षत्रीका अनुसार राष्ट्रिय कविता महोत्सव, व्यथित काव्य पुरस्कार, युवा वर्ष मोती पुरस्कार, मानश्री पुरस्कार, राष्ट्रिय प्रतिभा पुरस्कार र गजलश्री सम्मानबाट सम्मानित बजिमयले दर्जनौं साहित्यिक पत्रिकाको सम्पादन गरेका थिए ।

बजिमय सांस्कृतिक संस्थानका अध्यक्ष, नेपाल प्रज्ञा प्रतिष्ठानका प्राज्ञसभा सदस्य, वसुन्धरा मान प्रज्ञा प्रतिष्ठानका सदस्य, पोखरेली सांस्कृतिक परिवारका अध्यक्ष, नेपाली लेखक संघको केन्द्रीय नेतृत्वमा रहिसकेका छन् । अविवाहित बजिमयको पार्थिव शरीरलाई दाहसंस्कारका लागि आइतबार उनको जन्मस्थल पोखरा लगिएको परिवार स्रोतले जनाएको छ ।