अस्ताउँदो सूर्यलाई अर्‍घ दिइयो

जनकपुरधाम – छठ पर्वको तेस्रो दिन बुधबार अस्ताउँदो सूर्यलाई अर्‍घ दिइएको छ । जनकपुरधामसहित देशका विभिन्न स्थानका नदी, पोखरी तथा तालतलैयाहरूको छठ घाटहरूमा अस्ताउँदो सूर्यलाई अर्‍घ दिइएको हो ।

पोखरी नै पोखरीको सहरको रूपमा चिनिएको जनकपुरधामस्थित गंगासागर, धनुष सागर, अंगराज सर, रत्न सागरलगायत दुई दर्जनभन्दा बढी पोखरीका घाटहरू छठ पूजाका लागि यहाँका स्थानीय युवा क्लवहरुले टेन्ट र पण्डाल लगाएर सजाएका छन् । सो घाटमा राखिएका प्रसाद सामग्री व्रतालुले षष्ठी देवीलाई अराधना गर्दै अस्ताउँदै गरेको भगवान सूर्यलाई अर्‍घ दिएका हुन् । बिहीबार (भोलि) बिहान सप्तमी तिथिका दिन उदाउँदो सूर्यलाई अर्‍घ दिई पारणसँगै सम्पन्न हुनेछ । कात्तिक शूक्ल चतुर्थीदेखि सुरु हुने यो पर्व कार्तिक शूक्ल सप्तमी तिथिका दिन सम्पन्न हुन्छ । यो पर्वमा षष्ठी देवीका साथै सूर्यदेवको उपासना गरिन्छ । 

प्रजातन्त्रको असल उदाहरण दिने यो पर्व गरिब, धनी, दलित एवम् उच–नीचको ख्याल नगरी समाजमा रहेका सबै वर्ग एकसाथ मिलेर मनाउँछन् । अर्‍घ दिने ब्रतालु ३६ घण्टासम्म पानी पनि नखाई उपवास बस्ने गर्दछन् । छठ पर्वमा सूर्य भगवान अर्थात् दिनानाथलाई अर्‍घ दिन तयार गरिने परिकारहरू अत्यन्तै नियम निष्ठापूर्वक गर्नुपर्ने भएकाले छठलाई निष्ठा र कठोर पर्वको रूपमासमेत लिइन्छ ।

छठ पर्वको आराधना गर्नाले चर्मरोगबाट मुक्ति पाइने, निः सन्तानले सन्तान प्राप्त गर्ने, परिवारमा सुख शान्ति भित्रिने, आपसमा भाइचारा कायम हुने, मनकामना पूरा हुनेजस्ता जनविश्वास चली आएका छन् । तराई र मधेशमा मनाइँदै आएको मिथिला संस्कृतिमा आधारित छठ पर्वको व्यापकता पछिल्लो समय बढ्दै गएको देखिन्छ ।

केही दशकयता राजधानी काठमाडौंसहित देशका मध्यपहाडी जिल्लामा पनि सबै वर्ग समुदायले छठ पर्व मनाउने गरेको पाइन्छ । यता छठ पूजालाई दृष्टिगत गर्दै सुरक्षा व्यवस्थाका लागि जनकपुरधाममा सयौंको संख्यामा सुरक्षाकर्मी परिचालन गरिएको जिल्ला प्रहरी कार्यालय धनुषाका प्रमुख प्रहरी उपरीक्षक (एसपी) वसन्त रजौरेले बताए । ‘खासगरी छठ पर्व आयोजनाका लागि पोखरी भएका क्षेत्रमा भीडभाड हुन सक्ने र सो क्रममा हुनसक्ने सम्भावित चोरी र दुर्घटनाका घटनालाई दृष्टिगत गर्दै हामीले सादा पोशाकमा तथा मोबाइल टोली परिचालन गरेका छौं,’ उनले इकागजसँग भने ।