तनहुँमा ४ सय ९० गणक खटिँदै

तनहुँ – गण्डकी प्रदेशको तनहुँमा राष्ट्रिय जनगणनाको १२ औं शृंखलाको मुख्य गणनाको तयारी पूरा भएको छ । जिल्लामा ४ सय ९० गणक जनगणनाका निम्ति हरेक घरदैलोमा पुग्ने जिल्ला जनगणना अधिकारी नन्दलाल सापकोटाले बताए । उनका अनुसार संस्थागत घरपरिवारको गणना गर्न छ जना खटिनेछन् । ‘गणकलाई तालिम र सम्पूर्ण सामग्री दिएर पठाएका छौं । उनीहरू गणनाका लागि तम्तयार छन्,’ उनले भने ।

एक जना गणकले औसतमा २ सय घरमा पुगेर जनगणना फारम भर्नेछन् । ‘फारम भर्नलाई ५२ वटा मुख्य प्रश्न सोधिनेछ’, उनले भने । गणनाका लागि २० मिनेट समय लाग्ने जनाइएको छ ।

बिहीबारदेखि देशभर राष्ट्रिय जनगणनाा सुरु हुँदै छ । प्रत्येक १० वर्षमा हुने जनगणनाअन्तर्गतको मुख्य जनगणना बुधबार सुरु भएर ९ मंसिरमा सकिनेछ । 
जनगणनाको पहिलो चरणअन्तर्गत ३० भदौदेखि १८ असोजसम्म घर सूचीकरण गरिएको थियो । घर सूचीकरण गर्न तनहुँमा १२० जना सुपरिवेक्षक खटिएका थिए । सुपरिवेक्षकले जिल्लाका ९१ हजार घर सूचीकरण गरेका छन् । पछिल्लो १० वर्षको अवधिमा यहाँ झण्डै १३ हजार घर थपिएको प्रारिम्भक तथ्यांकले देखाउँछ । 

०६८ सालको जनगणनामा जिल्लामा ७८ हजार ३ सय ९ घर सूचीकरण गरिएको थियो । उक्त जनगणनाअनुसार तनहुँमा तीन लाख २३ हजार २८८ जनसंख्या छ ।जिल्लाका पाँच स्थानमा स्थानीय जनगणनाको कार्यालय स्थापना गरिएको छ । दुलेगौंडा, भिमाद, दमौली, डुम्रे र आँबुखैरेनीमा स्थानीय जनगणनाको कार्यालय स्थापना गरिएको हो ।