मानवीय सेवामा रेडक्रसको भूमिका प्रशंसनीय : मन्त्री थापा

पोखरा - गण्डकी प्रदेशका कानुन, सञ्चार तथा प्रदेश सभा मामिलामन्त्री विन्दुकुमार थापाले मानवीय सेवा रेडक्रसको भूमिका प्रशंसनीय रहेको बताएका छन् । सोमबार नेपाल रेडक्रस सोसाइटी कास्की शाखाले आयोजना गरेको शुभकामना आदानप्रदान कार्यक्रममा बोल्दै मन्त्री थापाले समाज सेवामा रेडक्रसले उल्लेखनीय काम गरेको बताए । 
‘समाजमा रेडक्रसको भूमिका महत्त्वपूर्ण छ । जहाँ दुःख छ, त्यहाँ रेडक्रस पुग्ने गरेको छ । परोपकारी संस्थाको रूपमा रेडक्रस परिभाषित छ । भूकम्पका बेला होस् या अन्य प्राकृतिक विपतका समयमा रेडक्रस सधैं अगाडि बढेको नकार्न सकिँदैन,’ उनले भने । 

मन्त्री थापाले कोभिडका समयमा सबै क्षेत्र ठप्प हुँदा एम्बुलेन्स सेवा र रगत अभावलाई परिपूर्ति गर्न रेडक्रसले पुर्‍याएको योगदानलाई प्रशंसा गरे ।  ‘हरेक क्षेत्र ठप्प हुँदा पनि रेडक्रस समाज सेवामा लागिरह्यो । सबै कोभिडबाट डराए तर रेडक्रसलाई मानवीय सेवामा समर्पित भएको देख्न पाइयो । महामारीमा एम्बुलेन्स सेवामा समस्या हुँदा समाधान भएर रेडक्रस उभियो । रगत अभावसमेत हुन दिएन । हाल केही हदसम्म भएको कोभिड नियन्त्रणमा रेडक्रसको भूमिका प्रशंसनीय छ,’ उनले भने ।

प्रदेश सरकारले रेडक्रसलाई निरन्तर रूपमा सहयोग गर्दै आइरहेको र आगामी समयमा पनि गरिरहने उनले प्रतिबद्धता जनाए । मन्त्री थापाले रेडक्रसले पोखरा ८ सिर्जनाचोकमा बनाउँदै गरेको अत्याधुनिक सुविधा सम्पन्न ब्लड बैंकका लागि आवश्यक भवन निर्माणमा देखिएका समस्यालाई सम्बोधन गर्ने बताए ।

कार्यक्रममा रेडक्रस सोसाइटी गण्डकीका सभापति सूर्य ढकालले विपतका समयमा काम गर्ने संस्था रेडक्रस सरकारको साझेदार भएको उल्लेख गरे ।उनले शिक्षा, स्वास्थ्य, खानेपानीको क्षेत्रमा रेडक्रसले काम गरिरहेको जानकारी गराए । 

नेपाल रेडक्रस सोसाइटी कास्कीका सभापति डोलराज पाण्डेले २०२२ सालमा झोलाबाट सञ्चालन भएको रेडक्रस क्रियाशीलताका आधारमा सोमबार यहाँसम्म आइपुगेको बताए । उनले नागरिकलाई सरल रूपमा थप सेवा प्रवाह गर्न कास्की रेडक्रसले स्रोत साधनको उपलब्धतालाई थप विस्तार गरिरहेको बताए ।