पाँचथर दुर्घटना: चार जनाको मृत्यु, ६१ घाइते (अपडेट)

विराटनगर- पाँचथरको फिदिम नगरपालिका-४ सखरखण्डेमा बस दुर्घटना हुँदा चार जनाको मृत्यु भएको छ । बसका चालकसहित ६१ जना घाइते भएका छन् ।सोमबार बिहान ११ बजे यासोकबाट फिदिमतर्फ आउँदै गरेको को १ ख ३८६५ नम्बरको बस सडकबाट करिब २० मिटर तल खसेर दुर्घटना भएको थियो ।

दुर्घटनामा बसमा सवार रहेका मोरङको लेटाङ नगरपालिका-६ का ७ वर्षीय बालक प्रज्वल मगर, ईलामकी ३४ वर्षीया प्रमीला देवान, उनको ७ महिने छोरा निश्चल देवान र अर्की एक महिलाको मृत्यु भएको जिल्ला प्रहरी कार्यालय पाँचथरले जनाएको छ ।

दुर्घटनाबाट गम्भीर घाइते भएका ११ जनालाई थप उपचारको लागि झापातर्फ पठाएको तथा अन्य घाईतेहरूको फिदिमका विभिन्‍न अस्पतालमा उपचार भइरहेको जनाइएको छ । प्रहरीले दुर्घटना हुनुको कारणबारे अनुसन्धानअघि बढाएको जनाएको छ ।