हत्या गरी आँगनमा खाल्डो खनी गाड्ने दुई आरोपी सार्वजनिक

काठमाडौँ - सिन्धुपाल्चोकको मेलम्चीमा हत्या गरेर आफ्नै घरको आँगनमा खाल्डो खनेर खाड्ने दुई आरोपीलाई सार्वजनिक गरिएको छ । मेलम्ची नगरपालिका-१० का नेत्रप्रसाद दाहालको हत्यामा संलग्न दुईजनालाई प्रहरीले सार्वजनिक गरेको छ ।  

जिल्ला प्रहरी कार्यालय सिन्धुपाल्चोकले आज (आइतबार) हत्यामा संलग्न लिसंखुपाखर-२ का ३५ वर्षीय छिरिङ तामाङ र काभ्रे खानेखोला गाउँपालिका-७ का ३३ वर्षीय कृष्ण मगरलाई सार्वजनिक गरेको हो ।  उनीहरूलाई असाेज २८ गते प्रहरीले नियन्त्रणमा  लिएकाे  थियाे ।

उनीहरूले दाहालको हत्या गरी मोबाइल आफ्नै साथमा लगेका थिए । उक्त मोबाइल लोकेसनको आधारमा दुवैलाई पक्राउ गरिएको जिल्ला प्रहरी कार्यालयका सूचना अधिकारी दक्षकुमार बस्नेतले जानकारी दिए । 

 घर निर्माणको ठेक्का लिने क्रममा मृतक दाहालको घरमा उनीहरू गएका थिए । ४० हजार ठेक्कामा घर निर्माण गर्ने सहमत्ति भएपनि अझै धेरै पैसा छ भन्ने आशामा उनीहरूले गत असोज १९ गते दाहालको हत्या गरेकाे स्विकारेका छन् । हत्या गरेपछि दाहालको शव घरको आँगनमा गाडिएको अवस्थामा प्रहरीले फेला पारेको थियो ।