एक महिने नि:शुल्क अनअराईभल भिसा कार्यान्वयनमा आएन, दुई महिनामा भित्रिए २५ हजार पर्यटक

फाइल तस्बिर

काठमाडौँ- मुलुकमा कोभिड-१९ खोप लगाउने क्रमले तीव्रता पाएसँगै संक्रमणदर र मृत्युदर पनि कमी हुँदै गएको छ । बिस्तारै आर्थिक-सामाजिक गतिविधिहरू पुरानो लयमा फर्कने प्रयासमा छ । मानिसको आवागमन र चहलपहल बढ् थालेको छ । 

स्वदेशमा रहेकाहरू विदेश जाने र विदेशी नागरिकहरू पनि नेपाल आउने क्रम फेरि बढ्न थालेको छ । कोभिडविरुद्धको खोप लगाएका नागरिकले क्‍वारेन्टाइन बस्‍ननपर्ने व्यवस्था भए पछि हिमाली पदमार्ग जानेहरूको संख्या बढन थालेका छन् । विदेशी नागरिकहरू पनि क्रमश: नेपाल प्रवेश गर्न थालेका छन् ।

सरकारले पर्यटन प्रवर्द्धन गर्न र कोभिडले खस्केको पर्यटन क्षेत्रलाई उकास्‍न विभिन्‍न रणनीति अपनाउन थालेको छ । नेपाल घुम्‍न आउने पर्यटकलाई  अनअराईभल भिसा निशुल्क दिने घोषणा गर्‍यो । तर, सरकारले कार्यविधि बनाउन नसक्दा निशुल्क भिसा कार्यान्वयनमा आउन सकेको छैन ।

पर्यटन मन्त्रालयले नि:शुल्क भिसासम्बन्धी कार्यविधि निर्माण गर्न ढिलाइ गर्दा याे व्यवस्था कार्यान्वयनमा नआएको पाइएको हो । अध्यागमन विभागका प्रवक्ता झंकनाथ ढकालका अनुसार पर्यटन मन्त्रालयले पर्यटकलाई नि:शुल्क भिसा उपल्बध गराउने कार्यविधि उपलब्ध गराएको छैन । पर्यटन मन्त्रालयले कार्यविधि बनाएर दिएमा नि:शुल्क भिसा उपलब्ध गराइने उनले प्रतिबद्धता जनाए ।

नि:शुल्क कार्यविधिको अध्ययन भएन

नि:शुल्क भिसा उपलब्ध गराउने कार्यविधिको विषयमा केही जानकारी नभएको  संस्कृति, पर्यटन तथा नागरिक उड्डयन मन्त्रालयका प्रवक्ता डा.टोकराज पाण्डेले बताए । मन्त्रालयमा आधिकारीक प्रवक्ताको जिम्मेवारी भर्खरै पाएको छु, यस विषयको फाइल अध्ययन गरेर मात्र केही भन्न सकिन्छ,' उनले भने ।

त्यसैगरी भदौदेखि असोज अन्तिमसम्ममा विभिन्‍न मुलुकबाट नेपालीसहित १ लाख ६० हजार ४७३ जनाले नेपाल प्रवेश गरेका छन् ।  पुरुष १ लाख ३१ हजार ९३७ र महिला २८ हजार ४३१ जना छन् ।  जसमध्ये १ लाख ३४ हजार ७४८ जना नेपाली नागरिक भित्रिएका छन् ।

त्रिभुवन विमानस्थलको अध्यागमनले उपलब्ध गराएको तथ्यांक अनुसार हवाई मार्गबाट भारत, अमेरिका र बेलायतबाट सबैभन्दा बढी नागरिक नेपाल आएका छन् । गत दुई महिनामा मात्र २५ हजार ७२५ विदेशी नागरिक भित्रिएका हुन् ।

बेलायतले नेपाललाई 'रेड लिस्ट' बाट हटाएपछि बेलायती नागरिकहरू नेपाल आउनेको संख्या बढन थालेका छन् । गत दुई महिनामा मात्र बेलायतबाट ७४८ जना नेपाल प्रवेश गरेका छन् ।

अमेरिकाबाट ३२७३, भारतबाट ७५०५, क्यानडा ३९३, बेल्जियमबाट १८८ अन्य मुलुकबाट भने थोरै संख्यामा विदेशी भित्रिएका छन् । पछिल्लो समय विदेशी नागरिक भित्रिने क्रम पनि बढेको विभागले जनाएको छ ।

पर्यटन प्रवर्द्धन गर्न पर्यटन क्षेत्रमा काम गर्नेलाई घुमाउने

नेपाल पर्यटन बोर्डको अनुसार दैनिक डेढ सयको हाराहारीमा विदेशी पर्यटक आउन थालेका छन् । सगरमाथा र अन्नपूर्ण क्षेत्र आरोहणका लागि अनुमति लिन थालेका हुन् ।

दैनिक चार-पाँच जना आउने केही सातादेखि सय भन्दा बढी विदेशी नागरिक अनुमति बोर्डका प्रवक्ता मणिराज लामिछाने बताउँछन् । 'पर्यटन बोर्डको पकेटमा विशेषगरी यो पकेट क्षेत्र रहेकाले अनुमति लिनेको संख्या बढेको हो,' उनले भने ।

यो मौसम पर्यटकको लागि मौसम विशेष सिजन हो । कोभिड महामारीले केही प्रभाव परे पनि पछिल्लो खोपको उपलब्धताले केही संख्या बढिरहेको बोर्डको दाबी छ । कोभिडविरुद्धको खोप मात्रा पूरा गरेकाले विदेशी नागरिकले क्‍वारेन्टाइन बस्‍ननपर्ने व्यवस्था छ । खोप लगाएको १४ दिन भने अनिवार्य पूरा गर्नुपर्ने छ ।

बोर्डले भारत र चीनका पर्यटकलाई लक्षित गरी लुम्बिनी क्षेत्र भ्रमण गराउने योजना बनाएको लामिछानेले बताए । भारतका पर्यटन क्षेत्रमा काम गर्ने ३० बढी कम्पनीका सिईओलाई लुम्बिनी भ्रमण गराउन लागेको उनले जानकारी दिए । बेलायतमा पर्यटन प्रवद्धन गर्न थालेको छ ।

नेपाल पर्यटन बोर्ड, होटल तथा ट्राभल कम्पनीले नेपालको पर्यटन क्षेत्रको मार्केटिङ गर्नलाई बेलायत लगायत विभिन्‍न मुलुकको भ्रमण गर्न लागेको लामिछानेको भनाइ छ । सामाजिक सञ्जाल तथा विभिन्‍न मुलुकमा ट्राभल एडभाइजरी राख्‍ने तयारीसमेत गरेको छ ।

पर्यटक भित्रिनु सकरात्मक, हौसिने बेला छैन

कोभिडले थलिएको पर्यटन क्षेत्रमा केही संख्यामा पर्यटक भित्रिनु सकरात्मक कुरा रहेको नेपाल पर्वतारोहण संघका अध्यक्ष सन्तवीर लामाले बताए । सिजनमा केही विदेशीहरू हिमाल आरोहण गर्न आएकाले पनि सकरात्मक रुपमा यसलाई लिन सकिने उनले धारणा व्यक्त गरे ।

कोभिड महामारी कहिलेसम्म रहन्छ त्यसमा निर्भर रहने उनको भनाइ छ । नेपाल कोभिड शून्य भएको सन्देश विश्‍वमाझ पुर्‍याउन सकेमा पर्यटक आउन सक्ने उनले बताए । मृत्युदर र संक्रमणदर नियन्त्रणोन्मुख भएमा मात्र सकरात्मक सन्देश जाने सक्ने उनले प्रस्ट पारे । नेपाललाई विभिन्‍न मुलुकले कोभिड जोखिमको 'रेड लिस्ट' राखेकाले त्यस्ता मुलुकलाई लिस्टबाट हटाउन सरकारले पहल गर्नुपर्ने उनको भनाइ छ ।