एक क्विन्टल गाँजासहित दुईजना पक्राउ

सिरहा प्रहरीले बरामद गरेको गाँजा

जनकपुरधाम : सिरहा प्रहरीले ठुलो मात्रामा गाँजासहित दुई जनालाई पक्राउ गरेको छ । आइतबार जिल्लाको मिर्चैया नगरपालिका १ मनहर्वास्थित भित्री सडक खण्डमा चेकजाँचको क्रममा ना ५ त १४ नम्बरको ट्रयाक्टरबाट प्रहरीले एक क्विन्टल गाँजा बरामद गरेको हो ।

दक्षिणबाट पुर्वतर्फ गइरहेको टयाक्टरमा ठुलो प्लास्टिकका ५ र सानो २ वटा पोकामा प्याक गरी राखिएको सो गाँजासहित ट्रयाक्टर चालक र सहचालक दुवैलाई प्रहरीले पक्राउ गरिएको छ । 

पक्राउ पर्नेमा मिर्चैया १ निवासी १९ वर्षे ट्रयाक्टर चालक सुन्दर कापर र सोही ठाउँका निवासी २६ वर्षे सहचालक जितेन्द्र महतो रहेका छन् । बरामद गरिएका गाँजा सहित टयाक्टर र पक्राउ परेका दुवैलाई नियन्त्रणमा राखेर अनुसन्धान प्रक्रिया अघि बढाइएको कुरा जिल्ला प्रहरी कार्यालय सिरहाले जनाएको छ ।