झाडापखाला फैलिएको कपिलवस्तुमा सरकारी विज्ञ टाेली

फाइल तस्बिर

काठमाडौँ- स्वास्थ्य तथा जनसंख्या मन्त्रालयले झाडा-पखाला प्रभावित कपिलवस्तुमा अनुगमन गर्न तीन जना चिकित्सकको टोली पठाएको छ । इपीडीमीयोलोजी तथा रोग नियन्त्रण महाशाखाबाट डा. शशी कँडेल, कौशलचन्द्र सुबेदी र विश्‍व स्वास्थ्य संगठनबाट डा. रबिन गौतमलाई पठाएको हो ।

कृष्णनगर नगरपालिकाको ३,४,७,८,९ र १२ मा १८ गते बेलुकीदेखि झाडापखाला देखिएको थियो । झाडा तथा बान्ताका बिरामीहरूको शिवराज अस्पतालमा उपचार भइरहेको मन्त्रालयले जनाएको छ । बिहीबार बिहानसम्म उपचारका लागि ३७० जना उपचाररत थिए । २२८ जना डिस्चार्ज भइसकेका छन् । ११० जना उपचाररत छन् ।

३२ जनालाई उपचारका लागि तौलिहवा र लुम्बिनी प्रादेशिक अस्पतालमा रिफर गरिएको मन्त्रालयका प्रवक्ता डा. कृष्ण पौडेलले जानकारी दिए ।उनका अनुसार पाँच जना दिशाको नमुना संकलन गरी परीक्षण गरिरहेको छ । नतिजा आउन बाँकी रहेको छ ।

नेपाली सेना, नेपाल प्रहरी, सशस्त्र प्रहरी एवं प्रादेशिक, जिल्ला तथा स्वास्थ्य कार्यालयको आपसी समन्वयमा औषधि तथा जनशक्ति परिचालन गरी झाडापखला नियन्त्रणका लागि प्रयास भइरहेको उनले बताए ।