'बीपी प्रतिष्‍ठानका संघर्षरत समूहका अधिकांश माग पुरा भए,स्वास्थ्य संस्था सेवा सूचारु गर्नू'

काठमाडौँ- धरानस्थित बीपी कोइराला स्वास्थ्य विज्ञान प्रतिष्‍ठानका शुद्धिकरण अभियान-२०७८, संयुक्त संघर्षसमितिले उठान गरेको अधिकांश सम्बोधन भइसकेको स्वास्थ्य तथा जनसंख्या मन्त्रायले जनाएको छ ।

मन्त्रालयले कोभिड-१९ को महामारीमा स्वास्थ्य जस्तो अत्यावश्यक र संवेदनशील क्षेत्र खुला राखी स्वास्थ्य सेवा सञ्चालन गर्न निर्देशन दिएको छ । आइतबार मन्त्रालयले जारी गरेको विज्ञप्‍तिमा संघर्षसमितिले गरेको थप मागहरू सम्बोधन हुने क्रममा रहेको  उल्लेख छ ।

मन्त्रालयसँग सम्बद्ध सार्वजनिक निकायका पदाधिकारी तथा सदस्यको नियुक्ति र मनोनयन सम्बन्धी मापदण्ड, २०७३ लाई परिमार्जन गरीएको छ । 'नियुक्ती सम्बन्धी कार्यविधि मापदण्ड निर्माणका लागि ३ जना प्राध्यापकसहित प्रमुख विशेषज्ञ डा. रमण सिंहको संयोजकत्त्वमा ७ सदस्यीय समिति गठन गरिएको छ,'जारी विज्ञप्‍तिमा लेखिएको छ ।

६ जना कार्यकारी परिषद्का सदस्यले सिनेटको बैठक बोलाउने बारेको निवेदन कुलपतिलाई दिए पश्‍चात सहकुलपतिज्युको नेतृत्त्वमा समिति बन्ने क्रममा रहेको मन्त्रालयले बताएको छ । प्रतिष्‍ठानका उपकुलपति डा. ज्ञानेन्द्र गिरीलाई प्राध्यापक उपाधिको प्रमाणपत्र पेश गर्न आग्रह गरिसकेको छ ।

प्रतिष्‍ठानमा कार्यरत उपकुलपति, शिक्षाध्यक्ष, रजिष्‍टार र अस्पताल निर्देशकलाई गतिरोध अन्त्य गर्न सहज निकासका लागि मार्ग प्रशस्त गर्न निर्देशन दिइसकेको मन्त्रालयले जनाएको छ ।