भारतले जित्यो अस्ट्रेलियाविरुध्दको टि-ट्‍वान्टी श्रृङ्खला

काठमाडौं : हार्दिक पान्ड्याको अविजित ४२ रनको मद्दतले भारतले अस्ट्रेलियामा जारी टि-ट्‍वान्टी श्रृङखलाको दोस्रो खेलमा आइतबार घरेलु टिमलाई ६ विकेटले पराजित गरेको छ । पहिलो खेलमा अस्ट्रेलियामाथि ११ रनको जित दर्ता गरेको भ्रमणकारी टोली भारतले लगातार दोस्रो जित हासिल गरेसँगै श्रृङखलामाथि नै कब्जा जमाएको छ ।
 
सिड्नीमा सम्पन्‍न खेलमा भारतले टस जित्दै फिल्डङ गर्ने निर्णय गरेको थियो । ब्याटिङको निम्तो पाएको अस्ट्रेलियाले २० ओभरमा पाँच विकेट गुमाउदै एक सय ९४ रन बनायो । घरेलु टिमका लागि ओपनर म्याथ्यु वाडेले ३२ बलको सामना गर्दै ५८ रनको योगदान गरे । त्यस्तै स्टिभ स्मिथले ४६ रन बनाए । भारतका लागि टि नटराजनले दुई विकेट लिए भने शार्दुल ठाकुर र युजभेन्द्र चाहालले एक-एक विकेट लिए ।
 
एक सय ९५ रनको लक्ष्य पछ्याएको भारतका लागि शिखर धवनले सर्वाधिक ५२ रन बनाए । त्यस्तै, कप्तान विराट कोहलीले २४ बलको सामना गर्दै ४० रन बनाए । म्यान अफ दि म्याच चुनिएका पान्ड्याले भारतको जितमा दुई छक्का र तीन चौका प्रहार गरे ।