त्रिभुवन विमानस्थलमा विशिष्ट कक्ष प्रयोगमा कडाइ

काठमाडौं- नेपाल नागरिक उड्डयन प्राधिकरणको विमानस्थल कार्यालयले त्रिभुवन अन्तर्राष्ट्रिय विमानस्थलको विशिष्ट कक्ष (भीआईपी लाउन्ज) प्रयोगमा कडाइ गर्ने भएको छ।  विमानस्थल कार्यालयले बुधबार सूचना निकालेर राजपत्रमा तोकिएका अति विशिष्ट र विशिष्ट व्यक्ति तथा पदाधिकारी बाहेकलाई भीआईपी लाउन्ज प्रयोग गर्न नदिने बताएको छ।

‘राष्ट्र/समाजमा विशेष योगदान दिई राष्ट्रिय/अन्तर्राष्ट्रिय पहिचान बनाएका ख्याति प्राप्त व्यक्ति, धार्मिक, समाजसेवी, प्रशासनविद, राजनीतिकर्मी, खेलाडी लगायत विभिन्न व्यक्तिबाट विशिष्ट कक्ष प्रयोगका लागि मौखिक तथा लिखित अनुरोध आउने र कहिलेकाहीँ दबाबसमेत आउने गरेको छ। अबदेखि राजपत्रमा उल्लेख गरिएका अति विशिष्ट र विशिष्ट व्यक्ति तथा पदाधिकारी बाहेकलाई विशिष्ट कक्ष उपलब्ध गराइने छैन,’ विमानस्थल प्रशासनले सूचनामा उल्लेख छ ।

विशिष्ट कक्ष प्रयोगका लागि सम्बन्धित निकायले कम्तीमा दुई घण्टाअगावै विमानस्थल कार्यालयलाई आधिकारिक पत्र पठाएर जानकारी गराउनुपर्नेछ।