६० किलो सुन तस्करी प्रकरण : अमला रोका फेरि पक्राउ

काठमाडौँ- ६० किलो सुन तस्करी प्रकरणकी अमला रोका फेरि पक्राउ परेकी छन् । सोमबार काठमाडौँ जिल्ला अदालतले २ लाख धरौटीमा रिहा गर्न आदेश दिएलगत्तै उनी फेरि पक्राउ परेकी छन् । 

केन्द्रीय अनुसन्धान ब्युरो (सीआईबी)का अनुसार सम्पत्ति शुद्धीकरण मुद्दामा पनि उनीविरुद्ध अनुसन्धान गर्नुपर्ने भएकाले पक्राउ गरिएको हो ।

तिब्बती मूलका बेल्जियन नागरिक दावा छिरिङकी पत्नी हुन् । २०८० साउन २ गते त्रिभुवन अन्तर्राष्ट्रिय विमानस्थलबाट भन्सार राजश्व जाँच पास गरेर बाहिरिएको ६१ केजी अवैध सुन तस्करीको मुद्दामा अनुसन्धान सुरु भएपछि फरार रहेकी उनी विरुद्ध इन्टरपोलमार्फत डिफ्युजन नोटिससमेत जारी गरेको थियो ।

काठमाडौँको ठमेलस्थित होटेल भियनाकी सञ्चालकसमेत रहेकी रोका माओवादी केन्द्र निकट रोल्पा-काठमाडौँ सम्पर्क मञ्चको पनि पूर्वउपाध्यक्ष हुन् ।