अफगानिस्तानमा कार बम विष्फोट, ३० सुरक्षाकर्मीको मृत्यु

अफगानिस्तानको गज्नी प्रान्तमा आइतबार कार बम विष्फोट हुँदा ३० सुरक्षाकर्मी मारिएका छन् भने २४ घाइते भएका छन् । अफगान अधिकारीहरूले मृत्य हुनेको संख्या बढ्न सक्ने सम्भावना रहेको जनाएका छन् ।

अफगानिस्तानको सुरक्षा दस्ता मध्येको एक पब्लिक प्रोटेक्सन र्फोसको कार्यलयको कम्पाउण्डलाई लक्षित गरी गराइएको विष्फोटमा कोही सर्बसाधारण घाइते नभएको बताइएको छ । तर केही घरहरूमा क्षति पुगेको अफगान अधिकारीहरुले जनाएका छन् । 

अफगानिस्तानको गृह मन्त्रालयले विष्फोटको पुष्टि गरे पनि थप जानकारी दिएको छैन । विष्फोटको जिम्मेवारी कसैले पनि नलिएको अफगान सञ्चारमाध्यमहरूले जनाएका छन् । 

यसैबीच, रायटर्सले विष्फोटका विषयमा तालिवानसँग सम्पर्क गरेको तर उसले कुनै टिप्पणी गर्न नमानेको बताएको छ ।   आफगानिस्तान सरकार तालिवानसँग शान्तिवार्तामा रहे पनि बम विष्फोटनको घटनामा कमी आएको छैन । आइतबार नै पूर्वी अफगानिस्तानको जाबुल इलाकामा भएको विष्फोटमा एकको मृत्य भएको थियो भने २३ घाइते भएका थिए ।  रोयटर्सबाट