प्रधानमन्त्रीलाई ट्रान्सपरेन्सी इन्टरनेशनलको प्रतिवेदन पढ्न कांग्रेसको आग्रह

काठमाडौँ : प्रमुख प्रतिपक्षी नेपाली कांग्रेसले ‘भ्रष्टाचारिको अनुहार नहेर्ने’ भन्‍ने  प्रधानमन्त्री केपी शर्मा ओलीलाई ट्रान्सपरेन्सी इन्टरनेशनलको प्रतिवेदन पढ्न आग्रह  गरेको छ । प्रवक्ता विश्‍वप्रकाश शर्माले शनिबार विज्ञप्ति जारी गरेर प्रधानमन्त्रीलाई ट्रान्सपरेन्सी इन्टरनेशनलको प्रतिवेदन पढ्न आग्रह गरेका हुन् । 

वर्तमान सरकार बनेपछि मुलुकमा भ्रष्टाचार व्यापक बढेको र प्रधानमन्त्री स्वयंले संरक्षण गरेको भनेर कांग्रेसले भन्दै आएको तथ्यलाई ट्रान्सपरेन्सी इन्टरनेशनलको प्रतिवेदनले पुष्टि गरेको विज्ञप्तिमा उल्लेख छ ।

एसियाली मुलुकहरूमा नेपालको स्थिति भ्रष्टाचारमा सबै भन्दा अगाडि देखिनु दुःखद भन्दै कांग्रेसले अन्तर्राष्ट्रिय जगतमा नेपालको छविमा यसबाट गम्भीर असर पुगेको स्थिति दृष्टिगत गर्दै सत्तारुढ पार्टीले संस्थागत धारणा सार्वजनिक गर्न अत्यन्तै अनिवार्य भएको बताएको छ ।

'एकातर्फ भ्रष्टाचारीको अनुहारसम्म हेर्दिन भनेर अभिव्यक्ति दिने अर्कातर्फ भ्रष्टाचारको अनेक प्रकरण ढाकछोप गर्न ओहोदाकै मर्यादासम्म प्रधानमन्त्रीले बिर्सिदिने, शक्ति प्रधानमन्त्री कार्यालयमा केन्द्रित गरेर अति शक्तिले अति भ्रष्ट बनाउंछ भन्ने मान्यतालाई पुष्टि गर्न तर्फ लाग्ने अनि भ्रष्टाचार विरुद्ध उठेका आवाजलाई पुर्वाग्रहपूर्ण देख्ने यस्तो प्रवृत्तिले मुलुकमा झनै बेथिति र भ्रष्टाचार बढाउने अनुमान गर्न सकिन्छ,' विज्ञप्तिमा छ ।

वाइड बडि, बालुवाटार, यति देखि सेक्युरिटी प्रीन्टिङ प्रेस हुँदै स्वास्थ सामग्री खरिद सम्ममा भएको भ्रष्टाचार प्रकरण उपर निष्पक्ष छानबिन र कडा कारबाही गर्न कांग्रेसले विगत देखिनै संस्थागत निर्णयहरुका साथ माग राख्दै आएको उल्लेख गर्दै विज्ञप्तिमा  ट्रान्सपरेन्सी इन्टरनेशनलको प्रतिवेदनले पार्टीका ती माग तथ्यपूर्ण रहेको पुष्टि गरेको दाबी गरिएको छ ।