साना किसान कृषि सहकारी संस्थाका प्रतिनिधिहरूसँग छलफल

काठमाडौँ - सहकारी संस्था वचत रकम दुरुपयोग सम्बन्धमा संसदीय छानबिन विशेष समितिले साना किसान कृषि सहकारी संस्थाका प्रतिनिधिहरूसँग छलफल गरेको छ । 

सिंहदरबारमा सोमबार बसेको समिति बैठकले साना किसान कृषि सहकारीले गरिरहेको काम कारवाहीदेखि भोग्नुपरेका समस्याका बारेमा प्रतिनिधिहरूसँग छलफल गरेको हो ।

बैठकमा २८ जनाले आ–आफ्नो संस्था संचालनको अनुभव र स्थितिको जानकारी गराएका थिए । सो क्रममा उनीहरुले साना किसान कृषि सहकारी संस्थामा रकम दुरुपयोगको समस्या नरहेको बताएका थिए ।

उनीहरुले कृषिजन्य बस्तुको बजारीकरण र भुक्तानीको समस्या भने देखिएको गुनासो गरेका थिए । समिति संयोजक सूर्य थापाले धेरै असफलताकाबीच साना किसान कृषि सहकारीको सफलताले अरूलाई प्रेरणा दिने बताए । उनले छानबिनका क्रममा भएका छलफलका क्रममा सहकारी क्षेत्रको दर्ता सूचना केन्द्र नरहेका कारण मुख्य समस्या देखिएको जिकिर गरे । 

हाल देशभर १ हजार ३ सय ६९ वटा साना किसान कृषि सहकारी संस्था संचालनमा रहेका छन् । सहकारी बचत रकम दुरुपयोग सम्बन्धमा छानविन गर्न संसदले गत १५ गते छानबिन समिति गठन गरेको थियो । समितिको तीन महिनाको समयअवधि भदौ २३ गते सकिँदैछ ।

समितिले निर्धारित समयसीमाभित्रै प्रतिवेदनलाई अन्तिम रुप दिने तयारी गरेको छ । यद्यपि सो समयमा प्रतिवेदन लेखनको काम सम्पन्न नभए केही दिन समय माग गर्ने विषयमा पनि छलफल भइरहेको समिति सदस्यहरूले जानकारी दिएका छन् ।