आवश्यक बन्दोबस्त मिलाएर धरहरा खुला गर्ने गरी काम भइरहेको छ  : उपप्रधानमन्त्री सिंह

काठमाडौँ - उपप्रधानमन्त्री एवं शहरी विकासमन्त्री प्रकाशमान सिंहले सरकारले आम सर्वसाधारणका लागि छिटै धरहरा खुला गर्ने गरि तयारी गरिररहेको बताएका छन् ।

बुधबार सिंहदरबारस्थित मन्त्रालयमा पूर्वाधार पत्रकारहरूको धरहरा सम्बन्धी जिज्ञासामा उपप्रधानमन्त्री सिंहले सरकारको सय दिनभित्रै धरहरा चढ्न मिल्ने गरि बन्दोबस्त मिलाउन लागिएको बताए । 

उपप्रधानमन्त्री सिंहले धरहराको सबै काम नसकिए पनि धरहरा चढ्न चाहनेहरूका लागि आवश्यक बन्दोबस्त भने छिटै हुने उनको भनाई थियो । ‘ धरहरा चढ्न चाहनेहरूका लागि सरकारले एक सय दिनभित्रै केही व्यवस्था गर्न लागिरहेको छ । धरहराको सबै होइन केही भाग खुला गर्नका लागि हामी लागिरहेका छौं,’ उपप्रधानमन्त्री सिंहले भने । 

त्यस्तै नयाँ शहरका सम्बन्धमा पत्रकारहरूको जिज्ञासामा उपप्रधानमन्त्री सिंहले उहाँले यसअघि सरकार अस्थिर हुँदा प्रक्रियामा ढिलाई भएको भन्दै अहिले संसदकै दुई ठूला दल मिलेर सरकार बनेकाले नयाँ शहरहरूलाई पनि सुरक्षित र व्यवस्थित गर्दै लैजाने प्रक्रियाले अब गति लिने बताए । 

 काठमाडौं उपत्यकाको फोहरमैला व्यवस्थापनका लागि पनि मन्त्रालयले स्थानीय तहसँग आवश्यक छलफल गरिरहेको उनले बताए । सरकारले अहिले नीति निर्माणमा बढी जोड दिइरहेको उपप्रधानमन्त्री सिंहको भनाई थियो ।