निषेधाज्ञा अवधिमा १ हजार ४७३ विदेशीले लिए भिसा, सबैभन्दा बढी चिनियाँ

काठमाडौँ : निषेधाज्ञा अवधिमा करिब २ महिनामा १४७३ विदेशी नागरिकले भिसा थपेका छन् । अध्यागमन विभागकाअनुसार निषेधाज्ञाका कारण भिसा थप्‍ने विदेशीको संख्यामा कमी भएको हो ।

केही साताअघि दैनिक चारदेखि पाँच जना भिसाका लागि आउने गरेका थिए । बुधबार भने अन्य दिनभन्दा भिसा थप गर्न आउने विदेशीको भिड लागेको विभागका महानिर्देशक नारायण प्रसाद भट्टराईले जानकारी दिए । उनकाअनुसार टुरिस्ट भिसामा ७९३, व्यापारिक भिसामा १७,बिज्नेस डिपेन्डेड १२, स्टडी डिपेन्डेड ३३, स्टडी २३, रिलेसनमा १०१, म्यारिजमा २४,  वर्किङ ३९९,  वर्किङ डिपेन्डेड  २८, एनआरएन १८, गैर टुरिष्‍ट २३ अफिसियल डिपेन्डेडमा २ जनाले भिसा लिएको अध्यागमन विभागले जनाएको छ ।

भिसा नवीकरण गर्न चीनका नागरिक सबैभन्दा बढी आउने गरेका छन् । अमेरिका, बेलायत, अष्ट्रेलिया, दक्षिण कोरिया र ब्राजिल लगायत अन्य मुलुकका विदेशी नागरिकहरू आइरहेको उनले बताए । निषेधाज्ञा अवधिमा नेपाल आइ बसेका विदेशी नागरिको भिसाको समय सकिएको छ भने त्यस्ता नागरिकलाई विलम्ब शुल्क नलिने महानिर्देशक भट्टराईले जानकारी दिए । 'निषेधाज्ञाको अवधिसम्म भिसाको समय हुनुपर्नेछ,' उनले भने,' टाढा-टाढा भएका मानिसहरूले भिसा थप्न नसक्ने भएकाले केही सुविधा दिएको छौ ।'

निषेधाज्ञा खुलेको र नियमित अन्तर्राष्ट्रिय उडान भएको एक सातामा विदेशी आएमा जरिवाना शुल्क नलाग्ने भट्टाइले बताए । उनका अनुसार निषेधाज्ञामा कुनै पनि विदेशीलाई नेपाल सरकारले अप्ठयारो पार्दैन । पर्यटकलाई भिसाको विषयलाई लिएर असहज अवस्था सिर्जना नगरिने भट्टराइको भनाइ छ ।

सरकारले आगामी आर्थिक वर्षदेखि एक महिनाका लागि अन-अराइभल भिसा दिने निर्णय गरको छ । पर्यटकका लागि एक महिनासम्म निशुल्कः भिसा कतिको सम्भव छ भन्ने प्रश्‍नमा महानिर्देशक भट्टराई भन्छन, 'सरकारले गरेको निर्णय हामीले कार्यान्वय गर्ने हो । निशुल्क र स:शुल्क गरे पनि हामीले पर्यटकलाई सुविधा दिने हो । सरकारको राजश्‍व घट्छ त्यति मात्र फरक हो ।'

'भिसाका बारेमा बुझ्‍न दैनिक दश जनाले फोन गर्छन्'

विभागले उपत्यका बाहिर दश ठाउँबाट भिसासम्बन्धी काम गर्ने गरेको छ । अध्यागमन कार्यालय पोखरा, अध्यागमन कार्यालय काकडभिट्टा, वीरगञ्‍ज, कोदारी, बेलहिया, जमुनाहा, मोहना, गड्डाचौकी, रसुवागढी र विराटनगरमा  रहेको  छ ।

काठमाडौं उपत्यका बाहिरबाट पनि भिसा नवीकरण गर्ने व्यवस्था गरिरहेको छ । पारिवारिक र नाता प्रमाणित जस्तो भिसाको लागि पोखरा अध्यागमन कार्यालयबाट भिसा थप्ने कार्य भइरहेको छ । 'उपत्यका बाहिर रहेका विदेशी नागरिकलाई लक्षित पोखराबाट भिसा सेवा सुविधा दिएका छौ ,' उनले भने ।

अध्यागमन कार्यालय काकडभिट्टा वरिष्ठ अध्यागमन सहायक माधव पौडेलका अनुसार निषेधाज्ञा जारी भएपछि करिब १० जनाले भिसा नवीकरण गरेका छन् । धेरै मानिसले भिसाको बारेमा के कस्तो अवस्था छ भनेर बुझ्‍न फोन गरिरहेको उनले जानकारी दिए ।

निषेधाज्ञा खुलेको सात दिनमा भिसा नवीकरण गर्न आएमा जरिवाना नलाग्ने पौडेलको भनाइ छ । 'नयाँ भिसाका लागि कोही पनि आएका छैनन्,' उनले भने,' इलाम , सुनसरीलगायत पूर्वका सबै जिल्लाका मानिसहरूले सोधिरहेका छन् ।'