दुई दिन सार्वजनिक बिदा थप गर्ने सरकारको निर्णय

काठमाडौँ- सरकारले साविकको बिदामा दुई दिन थप गर्ने निर्णय गरेको छ ।

मन्त्रिपरिषद्काे निर्णय सार्वजनिक गर्न शुक्रबार सिंहदरबारमा आयोजित पत्रकार सम्मेलनमा सरकारका प्रवक्ता रेखा शर्माले साविकको बिदामा माघ १६ को सहिद दिवस र राम नवमीमा बिदा दिने निर्णय भएको जानकारी दिइन् ।

बैठकले नेपाल-चीन व्यापार तथा भुक्तानी सम्झौता १९८१ लाई पुनरावलोकन तथा परिमार्जन गर्न नेपालको तर्फबाट मन्त्रालयका सहसचिवको संयोजकत्वमा संयुक्त प्राविधिक कार्यदल गठन गरेको छ भने झुटा विवरण पेस गरी सिराहा प्रशासन कार्यालयबाट प्राप्त गरेका ६ वटा नेपाली नागरिकताका प्रमाणपत्रहरू रद्द गरी नेपाली नागरिकबाट हटाउने समेत मन्त्रिपरिषद्ले निर्णय गरेको छ ।

त्यस्तै नेपाली सेनाका दुई सहायक रथीलाई उपरथीमा र नौ जना महासेनानीलाई सहायक रथीमा बढुवा गर्ने निर्णय भएको प्रवक्ता शर्माले बताइन्

प्रवक्ता शर्माले बालकुमारी घटना निकै गलत भएको बताइन् । आफ्ना असन्तुष्टि, विषय, शान्तिपूर्वक राख्न पाउने अधिकार सबैलाई रहे पनि त्यसको आफ्नै तरिका हुने भन्दै अराजकतालाई प्रश्रय दिने काम कसैले गर्न नहुने उनले बताइन् ।

उनले घटनाको विवरण लिने काम भइरहेको जिकिर गरिन् ।