प्रतिनिधिसभा बैठक भोलिसम्मका लागि स्थगित

काठमाडौँ– आज मंगलबारलाई तय भएको प्रतिनिधिसभा बैठक स्थगित भएको छ । अर्को बैठक बुधबार दिउँसो ३ बजे बस्ने सचिवालयले जनाएको छ । 

गत साउन १० गतेदेखि प्रमुख प्रतिपक्षी दल नेकपा एमालेको अडानका कारण अवरोध हुँदै आएको संसद् सोमबार शीर्ष नेताहरूबीच सहमति जुटेपछि आज सुचारु हुने भएको थियो । तर, दलहरूबीच छलफल जारी रहेकाले संसद् बैठक भोलिसम्मका लागि सरेको हो । 

एमालेले सुन तस्करी प्रकरणमा उच्चस्तरीय छानबिनको माग गर्दै आएको थियो । यस प्रकरणमा सत्तासीन दलहरू उच्च स्तरीय छानबिन समिति बनाउन तयार भएपछि एमाले संसद् चल्न दिन सहमत भएको थियो ।