करका दर वैज्ञानिक रूपमा प्रस्ताव गरिएको छ : अर्थमन्त्री महत

काठमाडौँ- अर्थमन्त्री डा प्रकाशशरण महतले वैज्ञानिक कर प्रणालीका कारण राजस्वको दायरा फराकिलो हुने विश्वास व्यक्त गरेका छन् ।

शुक्रबार राष्ट्रिय सभाको बैठकमा बजेटमाथिको छलफलका क्रममा उठेका जिज्ञासाको जवाफ दिँदै अर्थमन्त्री महतले भ्याटको दर घट्दै जाने र छुट हरेक वर्ष बढ्दै जाने प्रवृत्तिलाई हटाइएको र राजस्वका दर वैज्ञानिक रूपमा प्रस्ताव गरिएको बताएका हुन्

अर्थतन्त्रलाई सहज बनाउनका लागि बजेटले चालेको कदमका विरुद्ध केही स्वार्थ समूहहरू विरोधमा उत्रेको उनले बताए । उनले करको दायराले स्वदेशमा नै उत्पादन हुने प्याज,आलु जस्तो वस्तुलाई कुनै असर नपर्ने र आयातलाई निरूत्साहन गर्नका लागि करको प्रस्ताव ल्याइएको जिकिर गरे ।

विद्युतीय सवारी साधनमा कर तथा दैनिक उपभोग्य वस्तुमा कर लगाउँदा आमनागरिकलाई असर नगर्ने उनको भनाइ छ । विद्युतीय सवारीमा कम क्षमताका सवारीका लागि कम दर, बढी क्षमताका लागि बढी, त्योभन्दा पनि बढी क्षमताका गाडीलाई अझ बढी दर लगाइएको अर्थमन्त्रीले बताए । उनले विद्युतीय सवारी साधनमा करको दर हेरफेर गर्दा सूचना चुहाएको आरोप झुटो भएको जिकिर गरे ।

त्यस्तै उनले ६ प्रतिशतको आर्थिक वृद्धिदरको लक्ष्य प्रभावकारी खर्च , निजी क्षेत्रको सहि तवरले परिचालन भए सम्भव रहेकाले महत्वाकांक्षी नभएको दाबी गरे ।​

उनले संसदीय क्षेत्र पूर्वाधार कार्यक्रममाथि अविश्वास गर्नुपर्ने कुनै कारण नभएको जिकिर गरे । त्यस्तै अर्थमन्त्री महतले स्थानीय उद्योग व्यवसायलाई प्रवर्द्धन गर्नका लागि बजेटमार्फत आवश्यक सहजीकरण गरिएको तर्क गरे ।