कर्णालीका मुख्यमन्त्री शर्मालाई विश्वासको मत दिने/नदिने विषयमा निर्णय गर्दै कांग्रेस

सुर्खेत - कर्णालीका मुख्यमन्त्री राजकुमार शर्माले आज विश्वासको मत लिँदैछन् । शर्माले आज दिउँसो बस्ने प्रदेशसभा बैठकबाट विश्वासको मत लिने तयारी गरेका छन् ।

प्रदेश सभा सचिव जीवराज बुढाथोकीले आजको बैठकको कार्यतालिका १ बजे बस्ने सर्वदलीय बैठकपछि मात्रै बन्ने जानकारी दिए । यता नेपाली कांग्रेस र नेपा एमालेले अहिलेसम्म मुख्यमन्त्री शर्मालाई विश्वासको मत दिने या नदिने भन्ने विषयमा औपचारिक निर्णय गर्दै छन् ।

नेपाली कांग्रेस प्रदेश समितिका प्रवत्ता दमन शाहीले पार्टीको कार्यसम्पादन समितिको बैठक बसेर सबैको धारणा लिने काम गरिएको बताए । ‘पार्टीको कार्यसम्पादन समितिको धारणा लिने काम सकिएको छ’ इकागजसँग उनले भने, ‘अहिले साढे एक बजेदेखि सर्वदलीय बैठक बसिरहेको छ यसबाट विश्वासको मत दिने नदिने विषयमा निर्णय हुन्छ ।’

बैठक सकिएपछि मात्र औपचारिक निर्णय हुने शाहीले बताए । यता सरकारमा रहेको एमाले भने यति बेलासम्म ‘पर्ख र हेर’ को अवस्थामा छ । एमाले सांसद टेकराज पछाईले अहिलेसम्म कुनै निर्णय नभएको बताए । दलको बैठकले नै औपचारिक निर्णय गर्ने उनले बताए ।