नेपालको हवाइक्षेत्रलाई अझै सुरक्षित र दिगो बनाउन चुनौती : सचिव अधिकारी

काठमाडौँ - संस्कृति, पर्यटन तथा नागरिक उडड्यन मन्त्रालयका सचिव सुरेश अधिकारीले नेपालको हवाइक्षेत्रलाई अझै सुरक्षित र दिगो बनाउन चुनौती रहेको बताएका छन् । 

नेपाल नागरिक उडड्यन प्राधिकरण(क्यान) को २४ औं वार्षिकोत्सवको अवसरमा शनिबार काठमाडौंमा आयोजित कार्यक्रममा सचिव अधिकारीले पछिल्लो चार बर्षयता क्यानले निकै सुधारका काम गरेको भन्दै अझै नेपालको हवाइक्षेत्रलाई अझै सुरक्षित र दिगो बनाउन चुनौती रहेको बताएका हुन् । 

पछिल्ला वर्षमा अन्तराष्ट्रिय विमानस्थल र आन्तरिक विमानस्थलको स्तरोन्नतीका लागि क्यानले उपलव्धिपूर्ण काम गरेको उनले बताए । सचिव अधिकारीले अमेरिका, स्वीजरल्याण्ड, रुवान्डालगायत विभिन्न देशहरुसंग हवाई सेवासम्बन्धी सम्झौता अघि बढेको जानकारी दिए । 

प्राधिकरणका महानिर्देशक प्रदीप अधिकारीले त्रिभुवन विमानस्थलमा हुने विमान चापलाई ध्यान दिई रात्रीकालिन उडानलाई प्राथमिकतामा राखिएको जानकारी दिए ।  गौतमबुद्ध विमानस्थलमा उडानमा प्रोत्साहन गर्न अन्तराष्ट्रिय सेवा प्रदायकलाई सहुलियत दिइएको उनले बताए । उनले आन्तरिक उडानलाई थप सुरक्षित र व्यवस्थित गर्नका लागि पनि प्रविधिलाई पनि समयानुकूल विकसित गर्दै लगेको जानकारी दिए । 

कार्यक्रममा क्यानको वार्षिक बुलेटिन सार्वजनिक गरिएको थियो भने विभिन्न व्यक्तिहरुलाई सम्मान गरिएको थियो ।