स्राेत नखुलेको २४ लाखभन्दा बढी रकमसहित एक भारतीय पक्राउ

जनकपुरधाम। स्रोत नखुलेको २४ लाखभन्दा बढी रकमसहित धनुषा सशस्त्र प्रहरीले एक भारतीय नागरिकलाई पक्राउ गरेको छ । सशस्त्र प्रहरी बल धनुषाका अनुसार पक्राउ पर्नेमा भारतको विहार राज्य मधुवनीं जिल्ला मंगपट्टी वडा नम्बर १ मन्दिर, विशौल निवासी २३ वर्षीय उमेश कुमार रहेका छन् ।

भारतबाट अवैध रुपमा नेपालतर्फ आइरहेको प्रदेश २–०२–००५ प ५७९८ नम्बरको मोटरसाइकललाई धनुषाको बिदेह नगरपालिका ९ इटहर्वास्थित सीमा इलाका सशस्त्र प्रहरीको टोलीले चेकजाँच गर्दा ट्याङ्कीभित्र लुकाई छिपाई राखिएको स्रोत नखुलेको २४ लाख १७ हजार रकम बरामद गरिएको सशस्त्र प्रहरी बल धनुषाको मुख्यालयले जनाएको छ ।

नियन्त्रणमा लिइएका मोटरसाइकलको दुई लाख मूल्याङ्कन गरी बरामद गरिएका रकमसहित ती युवकलाई आवश्यक कारवाहीका लागि भन्सार कार्यालयमा बुझाइएको सशस्त्र प्रहरी बल मुख्यालयले जानकारी दिएका छन् ।