एम्बुलेन्सबाटै भागे तीन जना संक्रमित

धनगढी : कैलालीको धनगढीमा आइसोलेसन लैजाने क्रममा तीन जना कोभिड-१९ संक्रमित एम्बुलेन्सबाटै भागेका छन् । बिहीबार गौरीफन्टा नाका हुँदै नेपाल भित्रिएका उनीहरूलाई ऐन्टिजेन विधिबाट संक्रमण पुष्टि भएको थियो ।

नाकामा स्थापना गरिएको हेल्थ डेस्कका इञ्चार्ज दिनेश ठकुल्लाका अनुसार संक्रमण पुष्टि भएपछि सेती प्रादेशिक अस्पतालको एम्बुलेन्समा धनगढी उपमहानगरपालिका–१५ कनरीमा रहेको आइसोलेसनमा पठाउने क्रममा तीन जना भागेका हुन् । संक्रमित सबै भारतीय नागरिक रहेको र उनीहरूको खोजी भइरहेको प्रहरीले जनाएको छ । बिहीबार त्रिनगर नाका भएर कैलाली भित्रिएका ६२ जनामा कोभिड पुष्टि भएको थियो ।